சேலம் வழியாக சென்ற ரெயிலில் கடத்தப்பட்ட 21 கிலோ கஞ்சா பறிமுதல்-2 பேர் கைது

சூரமங்கலம்:

சேலம் வழியாக சென்ற ரெயிலில் கடத்தப்பட்ட 21 கிலோ கஞ்சா பறிமுதல் செய்யப்பட்டது. இதுதொடர்பாக 2 பேர் கைது செய்யப்பட்டனர்.

சேலம் வழியாக செல்லும் ரெயில்களில் கஞ்சா கடத்தப்படுவதை தடுக்க ரெயில்வே போலீசாரும், பாதுகாப்படை படையினரும் தீவிர நடவடிக்கை எடுத்து வருகின்றனர். இந்த நிலையில் நேற்று தன்பாத்- ஆலப்புழா எக்ஸ்பிரஸ் ரெயிலில் ரெயில்வே பாதுகாப்பு படை குற்றப்புலனாய்வு பிரிவு சப்- இன்ஸ்பெக்டர் கார்த்திகேயன், போலீஸ்காரர்கள் கமலநாதன், சவுந்தரராஜன், குணசீலன், செந்தில்குமார் ஆகியோர் கொண்ட சிறப்பு தனிப்படையினர் சேலத்தில் ரெயிலில் ஏறி சோதனை நடத்தினர்.

ஒவ்வொரு பெட்டியாக சோதனை நடத்திய போது, சங்ககிரி அருகே ரெயில் சென்ற போது எஸ்-10 என்ற பெட்டியில் சந்தேகப்படும்படியாக 2 பேர் அமர்ந்து இருந்தனர். அவர்களிடம் இருந்த பைகளை போலீசார் சோதனை நடத்தினர்.

அந்த பையில் 21 கிலோ கஞ்சா இருந்தது. அவை பாக்கெட்டுகளாக இருந்தன. அதன் மதிப்பு ரூ.4 லட்சத்து 83 ஆயிரம் என கூறப்படுகிறது. அதனை பறிமுதல் செய்த போலீசார், அங்கிருந்த 2 பேரிடமும் விசாரணை நடத்தினர். விசாரணையில் அவர்கள், கேரள மாநிலம் வயநாடு அருகே கப்பிக்கலாம் பகுதியைச் சேர்ந்த ராகுல் மனோஜ் (வயது 21), மற்றொருவர் பாலக்காடு மாவட்டம் மணக்காடு முத்துக்குருஷி பகுதியைச் சேர்ந்த ரெனில் பிஜு (20) என்பது தெரியவந்தது,

உடனே போலீசார் 2 பேரையும் கைது செய்து போதைப்பொருள் தடுப்பு பிரிவு போலீசாரிடம் ஒப்படைத்தனர்.