<
ஹெலிகாப்டரில் இருந்து வெடிகுண்டு போட்டாலும் கொள்கை நிலைப்பாட்டில் மாற மாட்டோம். பா.ஜ.க. மாநில தலைவர் அண்ணாமலை பேச்சு
ஹெலிகாப்டரில் இருந்து வெடிகுண்டு போட்டாலும் கொள்கை நிலைப்பாட்டில் இருந்து மாறமாட்டோம் என வேலூரில் பா.ஜ.க. மாநில தலைவர் அண்ணாமலை பேசினார்.
வேலூர்
ஹெலிகாப்டரில் இருந்து வெடிகுண்டு போட்டாலும் கொள்கை நிலைப்பாட்டில் இருந்து மாறமாட்டோம் என வேலூரில் பா.ஜ.க. மாநில தலைவர் அண்ணாமலை பேசினார்.
அறிமுக கூட்டம்
வேலூர் மாவட்டத்தில் பா.ஜ.க. சார்பில் போட்டியிடும் வேட்பாளர்கள் அறிமுக கூட்டம் வேலூர் மண்டி தெருவில் நடந்தது. மாவட்ட தலைவர் தசரதன் தலைமை தாங்கினார். மாநில செயலாளர் கார்த்தியாயினி, துணை தலைவர் ஜெகன்நாதன் உள்பட நிர்வாகிகள் பலர் முன்னிலை வகித்தனர்.
சிறப்பு அழைப்பாளராக மாநில தலைவர் அண்ணாமலை கலந்து கொண்டு வேட்பாளர்களை அறிமுகம் செய்து வைத்து பேசியதாவது:-
தமிழகத்தில் ஊழல் இல்லாத நிர்வாகம் அமைய நடைபெற உள்ள நகர்ப்புற உள்ளாட்சி தேர்தலில் பா.ஜ.க. வேட்பாளர்களை ஆதரிக்க வேண்டும். இவர்கள் அனைவரும் சாதாரண குடும்பத்தில் இருந்து வந்தவர்கள்.
தி.மு.க. தலைவர் மு.க.ஸ்டாலின் சட்டமன்ற தேர்தல் அறிக்கையில் 517 வாக்குறுதிகளை அளித்தார். ஆனால் 7 வாக்குறுதிகளை கூட அவரால் முழுமையாக நிறைவேற்ற முடியவில்லை. அண்மையில் வழங்கப்பட்ட பொங்கல் தொகுப்பு பொருட்களில் ஒன்று கூட தரமான பொருட்கள் வழங்கப்படவில்லை. இதனால் ஏழை, எளிய மக்கள் பெரிதும் பாதிக்கப்பட்டனர்.
தமிழகத்தின் 8 மாத கால ஆட்சியில் மக்களுக்கான எந்தவித திட்டமும் தி.மு.க. கொண்டு வரப்படவில்லை.
நீட் தேர்வு
நீட் தேர்வு கொண்டு வரப்பட்டதன் மூலம் தற்போது அரசு பள்ளியில் பயின்ற 541 மாணவர்கள் மருத்துவக் கல்வியைப் பயின்று வருகின்றனர். இவர்கள் அனைவரும் ஏழ்மையான குடும்பத்திலிருந்து வந்தவர்கள். அரசு நிர்ணயித்த கட்டணங்களை கூட கட்டமுடியாத நிலையில் பல மாணவர்கள் உள்ளனர். இவர்கள் எல்லாம் தற்போது மருத்துவ கல்வி பயில காரணமாக இருப்பது நீட்தேர்வு தான். நீட் தேர்வு இல்லாத காலத்தில் மருத்துவக் கல்வி பயில பல்வேறு முறைகேடுகள் நடைபெற்று உள்ளது. அவை எல்லாம் தற்போது களையப்பட்டு உள்ளது. தனியார் மருத்துவக்கல்லூரிகள் பாதிக்கப்பட கூடாது என்பதற்காக நீட் தேர்வை எதிர்க்கிறார்கள். தனியார் கல்லூரியின் கல்விக் கொள்கையை நீட் உடைத்துள்ளது.
காணொலி பிரசாரம்
2024-ல் எம்.பி. தேர்தலும், எம்.எல்.ஏ. தேர்தலும் ஒன்றாக வரும் என்று கூறுகிறார்கள். இது தமிழகத்தில் ஆட்சி எப்படி நடக்கிறது என்பதை பொருத்துத்தான் அமையும்.
வேலூர் மாநகராட்சியில் ஸ்மார்ட் சிட்டி திட்டத்தை நிறைவேற்ற பல ஆண்டுகள் ஆகி உள்ளது. ஊழல் காரணமாக இந்த திட்டம் நிறைவேற்ற பல ஆண்டுகள் ஆகியுள்ளது. இன்னும் கூட அந்த திட்டம் முடியவில்லை.
எனவே இதுபோன்ற ஊழல் இல்லாத ஆட்சி தர பா.ஜ.க.வில் மட்டுமே தான் முடியும். இதன் மூலம் மாற்றத்தை ஏற்படுத்த முடியும். மக்களின் வாழ்க்கையும் மேம்படும். தமிழகத்தில் பா.ஜ.க மட்டுமே மாற்றுக் கட்சியாகும். மக்களுக்கு மாற்றத்தை தரும் கட்சியாகும்.
தி.மு.க. மீது மக்களுடைய கோபம் எந்த அளவுக்கு உள்ளது என்பதை முதல்-அமைச்சர் மு.க.ஸ்டாலின் புரிந்து கொண்டதால் நேரிடையாக பிரசாரம் செய்யாமல் காணொலி காட்சி வாயிலாக பிரசாரம் செய்கிறார். வேலூரிலும் வாரிசு அரசியல் உள்ளது.
ஹெலிகாப்டரில் இருந்து வெடிகுண்டு போட்டாலும் கொள்கை நிலைப்பாட்டில் இருந்து மாறமாட்டோம்.
இவ்வாறு அவர் பேசினார்.
கமல்ஹாசன் அரசியல் குறித்து விமர்சனம்
வேலூரில் பா.ஜ.க. சார்பில் நடந்த வேட்பாளர்கள் அறிமுக கூட்டத்தில் மாநில தலைவர் அண்ணாமலை பேசும்போது அவருக்கு எதிரே உள்ள கட்டிடத்தில் மக்கள் நீதி மய்யத்தின் தலைவர் நடிகர் கமல்ஹாசன் தொகுத்து வழங்கும் நிகழ்ச்சியின் பேனர் இருந்தது. அதைப்பார்த்து அண்ணாமலை கூறுகையில், புதிய கட்சிகள் காளாண் போன்று முளைத்துக்கொண்டே இருக்கிறது. கமல்ஹாசன் அங்கு (சினிமா) இருக்கிறாரா?, அல்லது இங்கு (அரசியல்) இருக்கிறாரா? என நமக்கு குழப்பமாக உள்ளது. இவர் போன்றவர்கள் அரசியல் மாற்றத்தை கொடுப்பார்கள் என்று கூறுகிறார்கள். எவ்வாறு அரசியல் மாற்றத்தை தர முடியும். அரசியலில் ஒரே நிலைப்பாட்டில் இருக்க வேண்டும். நடுவில் இருக்க கூடாது என்றார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
