அடையாளம் தெரியாத வாகனம் மோதி வாலிபர் பலி

ராணிப்பேட்டை மாவட்டம் வாலாஜா தாலுகா ஈச்சந்தாங்கல் கிராமத்தில் வசித்து வந்தவர் முருகேசன் (வயது 32). இவர் கர்நாடக மாநிலம் பெங்களூருவில் செருப்பு கடை நடத்தி வந்தார். இவர் ஆர்.கே. பேட்டை அருகே சோளிங்கரில் நடந்த தனது உறவினர் திருமணத்தில் கலந்து கொண்டார். பின்னர் தனது உறவினர் பாலாஜி (25) என்பவருடன் சேர்ந்து மோட்டார் சைக்கிளில் பள்ளிப்பட்டு தாலுகா புத்தேரி பஸ் நிலையம் அருகே சென்று கொண்டு இருந்தார்.

அப்போது எதிரே வந்த அடையாளம் தெரியாத வாகனம் மோட்டார் சைக்கிள் மீது மோதி விட்டு நிற்காமல் சென்று விட்டது. இந்த விபத்தில் தலையில் பலத்த காயமடைந்த முருகேசன் சிகிச்சைக்காக சோளிங்கர் அரசு ஆஸ்பத்திரியில் சேர்க்கப்பட்டனர். அங்கு அவரை பரிசோதனை செய்த டாக்டர்கள் முருகேசன் வரும் வழியிலேயே இறந்துவிட்டதாக தெரிவித்தனர். இந்த விபத்தில் காயம் அடைந்த பாலாஜி சோளிங்கர் அரசு ஆஸ்பத்திரியில் சிகிச்சை பெற்று வருகிறார்.

இந்த விபத்து குறித்து முருகேசனின் மனைவி ஆர்.கே. பேட்டை போலீசில் புகார் செய்தார். இது குறித்து வழக்குப்பதிவு செய்த போலீசார் தொடர்ந்து விசாரித்து வருகின்றனர்.