<
சிதம்பரம் நடராஜர் கோவிலில் தரிசனம் செய்ய கனகசபைக்கு சென்ற தீட்சிதர், பெண் மீது தாக்குதல் 3 தீட்சிதர்கள் மீது வழக்கு
சிதம்பரம் நடராஜர் கோவிலில் தரிசனம் செய்ய கனகசபைக்கு சென்ற தீட்சிதர், பெண் தாக்கப்பட்டனர். இது தொடர்பாக 3 தீட்சிதர்கள் மீது போலீசார் வழக்குப்பதிவு செய்துள்ளனர்.
சிதம்பரம்,
சிதம்பரம் வடக்கு வீதியை சேர்ந்தவர் கணேஷ் தீட்சிதர் (வயது 57). இவர் நேற்று முன்தினம் இரவு சிதம்பரம் நடராஜர் கோவிலில் கனகசபைக்கு சென்று சாமி தரிசனம் செய்ய முயன்றார். இதை பார்த்த அங்கிருந்த தீட்சிதர்கள் ராஜசெல்வம், சிவசெல்வம், சபேசன் ஆகியோர் கணேஷ் தீட்சிதரிடம் வாக்குவாதத்தில் ஈடுபட்டனர்.
அப்போது தீட்சிதர்கள், கனகசபைக்கு மேல் ஏறி தரிசனம் செய்யக்கூடாது. கோவிலின் விதிமுறைகளை மீறிய காரணத்தால் உங்களை சஸ்பெண்டு செய்துள்ளோம். இனி கோவிலுக்குள் வந்தால் கொலை செய்துவிடுவோம் என்று மிரட்டியதோடு கணேஷ் தீட்சிதரை தாக்கியதாகவும் கூறப்படுகிறது.
3 தீட்சிதர்கள் மீது வழக்கு
இதில் காயமடைந்த கணேஷ் தீட்சிதர் சிதம்பரம் அரசு ஆஸ்பத்திரியில் சிகிச்சை பெற்றார். இதுகுறித்து அவர் சிதம்பரம் நகர போலீசில் அளித்த புகாரின் பேரில் தீட்சிதர்கள் ராஜசெல்வம், சிவசெல்வம், சபேசன் ஆகியோர் மீது போலீசார் வழக்குப்பதிவு செய்து விசாரித்து வருகின்றனர்.
பெண்ணுக்கும் அடி
இதற்கிடையே நேற்று காலை சிதம்பரம் பழைய புவனகிரி ரோட்டை சேர்ந்த ஜெயசீலா (37) என்பவர் நடராஜரை தரிசனம் செய்ய கனகசபைக்கு சென்றுள்ளார். அப்போது அங்கிருந்த சில தீட்சிதர்கள் ஜெயசீலாவை திட்டி, தாக்கி வெளியே அனுப்பி வைத்துள்ளனர்.
இது குறித்து ஜெயசீலா சிதம்பரம் நகர போலீசில் புகார் அளித்தார். அதன் பேரில் தீட்சிதர்கள் மீது போலீசார் வழக்குப்பதிவு செய்துள்ளனர்.
காரணம் என்ன?
இது குறித்து கணேஷ் தீ்ட்சிதர் கூறுகையில், சமீபத்தில் நடந்த தீட்சிதர்கள் ஆலோசனை கூட்டத்தில், நடராஜர் கோவிலில் கனகசபைக்கு சென்று பக்தர்கள் வழிபட அனுமதி அளிக்கக்கூடாது என்று முடிவு செய்யப்பட்டுள்ளது. இதற்கு நான் கடும் எதிர்ப்பு தெரிவித்தேன்.
இதனால் என்னை தீட்சிதர்கள் ஒன்று சேர்ந்து சஸ்பெண்டு செய்துவிட்டனர். இருப்பினும், நான் கனகசபைக்கு சென்று தரிசனம் செய்ய முயன்றபோது தாக்கப்பட்டேன் என்றார். நடராஜர் கோவிலில் கணேஷ் தீட்சிதர், ஜெயசீலாவை தீட்சிதர்கள் தாக்கிய சம்பவம் பெரும் பரபரப்பை ஏற்படுத்தி உள்ளது.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
