நகரப்பகுதி, பேரூராட்சிகளில் வேட்பாளர்கள் இறுதி கட்ட பிரசாரத்தில் தீவிரம் வார்டில் தெருவை சுற்றி, சுற்றி வந்து வாக்கு சேகரிப்பு

கறம்பக்குடி பேரூராட்சி பகுதியில் உள்ள 15 வார்டுகளிலும் அனைத்து கட்சியினர் மற்றும் சுயேட்சை வேட்பாளர்கள் இறுதிகட்ட பிரசாரத்தில் தீவிரமாக ஈடுபட்டு உள்ளனர். தி.மு.க. கூட்டணி வேட்பாளர்களை ஆதரித்து அமைச்சர், எம்.பி., எம்.எல்.ஏ., மாவட்ட பொறுப்பாளர் மற்றும் உள்ளாட்சி அமைப்புகளின் நிர்வாகிகள் நேற்று வீதி வீதியாக சென்று ஓட்டு சேகரித்தனர். மோட்டார் சைக்கிள் ஊர்வலம், பேண்டு வாத்தியம் என தி.மு.க.வின் பிரசாரத்தால் கறம்பக்குடி களை கட்டி உள்ளது. அ.தி.மு.க. சார்பில் போட்டியிடும் வேட்பாளர்களை ஆதரித்து முன்னாள் அமைச்சர் மற்றும் கட்சி நிர்வாகிகள் ஒட்டு சேகரிப்பில் ஈடுபட்டனர். 5 இடங்களில் மேடை அமைத்து கரகாட்டம் உள்ளிட்ட கலை நிகழ்ச்சிகளுடன் பிரசாரம் நடைபெற்றது. இதை தவிர கட்சி நிர்வாகிகள் வீடு வீடாக சென்று ஒட்டு சேகரித்தனர். இதேபோல் பாரதீய ஜனதா, நாம் தமிழர், அ.ம.மு.க. எஸ்.டி.பி.ஐ, மார்க்சிஸ்ட் லெனினிஸ்ட் கட்சிகளின் வேட்பாளர்கள் தங்கள் ஆதரவாளர்களுடன் இறுதிகட்ட வாக்கு சேகரிப்பில் ஈடுபட்டனர். சில வார்டுகளில் அரசியல் கட்சிகளுக்கு நிகராக சுயேட்சை வேட்பாளர்களும் ஆட்டோ பிரசாரம், ஊர்வலம் என பிரசாரத்தை முடக்கிவிட்டு உள்ளனர். எந்த வார்டில் யாருக்கு ஆதரவு அதிகம், வெற்றி பெற போவது யார் என தெரியாமல் வாக்காளர்களும் குழம்பம் அடைந்து உள்ளனர். இதற்கு விடை வருகிற 22-ந்தேதி தான் தெரியவரும்.

தி.மு.க.வேட்பாளர்களுக்கு ஆதரவாக தமிழக சட்டத்துறை அமைச்சர் ரகுபதி நேற்று காலை 9-வது வார்டில் இருந்து பிரசாரம் தொடங்குவதாக இருந்தது. ஆனால் அதே நேரத்தில் அ.தி.மு.க. வேட்பாளர்களை ஆதரித்து முன்னாள் அமைச்சர் விஜயபாஸ்கர் பேச உள்ளதாக அப்பகுதியில் மேடை அமைக்கப்பட்டது. இதனால் அமைச்சர் ரகுபதி 8-வது வார்டில் பிரசாரம் தொடங்கினார். சிறிது நேரத்தில் அமைச்சர் விஜயபாஸ்கர் வரவே 10 நிமிட இடைவெளியில் ஒவ்வொரு வார்டிலும் 2 பேரும் பிரசாரம் செய்தனர். இதனால் பரபரப்பு ஏற்பட்டது.