கோவிலுக்கு சென்றுவிட்டு நடந்து வந்தபோது மோட்டார் சைக்கிள் மோதி சிறுமி பலி - தாய்-தம்பி படுகாயம்

திருவொற்றியூர்,

திருவொற்றியூர் குப்பம் பகுதியைச் சேர்ந்தவர் முரளிதரன். மீனவரான இவருடைய மனைவி சரண்யா (வயது 30). இவர்களது மகள் யுவஸ்ரீ (வயது 11), மகன் ஆகாஷ் (9). இவர்கள் 3 பேரும் நேற்று முன்தினம் திருவொற்றியூர் வடிவுடையம்மன் கோவிலில் நடந்த பிரம்மோற்சவ விழாவில் கலந்து கொண்டுவிட்டு இரவு 9.30 மணி அளவில் எண்ணூர் விரைவு சாலையில் பட்டினத்தார் கோவில் அருகே வீட்டுக்கு நடந்து சென்று கொண்டிருந்தனர். அப்போது மஸ்தான் கோவில் அருகில் இருந்து ஒரே மோட்டார் சைக்கிளில் 3 பேர் வேகமாக வந்து கொண்டிருந்தனர். 

திடீரென கட்டுப்பாட்டை இழந்த மோட்டார் சைக்கிள், சாலையில் நடந்து சென்ற சரண்யா, அவரது மகள் யுவஸ்ரீ, மகன் ஆகாஷ் ஆகியோர் மீது பயங்கரமாக மோதியது. இதில் பலத்த காயமடைந்த 3 பேரையும் சிகிச்சைக்காக ஸ்டான்லி ஆஸ்பத்திரிக்கு கொண்டு சென்றனர். அங்கு சிகிச்சை பெற்று வந்த சிறுமி யுவஸ்ரீ, நள்ளிரவில் சிகிச்சை பலனின்றி பரிதாபமாக உயிரிழந்தார். விபத்தில் காயமடைந்த சிறுவன் ஆகாசுக்கு காலில் எலும்பு முறிவு ஏற்பட்டது. சரண்யாவுக்கு முன்பக்க நெற்றி மற்றும் தலையில் அடிபட்டு தீவிர சிகிச்சை பிரிவில் அனுமதிக்கப்பட்டு உள்ளார்.

இது தொடர்பாக வண்ணாரப்பேட்டை போக்குவரத்து போலீசார் வழக்குப்பதிவு செய்து குடிபோதையில் மோட்டார் சைக்கிளை ஓட்டிவந்ததாக கிருத்தீஸ் (20) மற்றும் அவருடன் வந்த சக்திகுமார், சூர்யா ஆகிய 3 பேரையும் பிடித்து விசாரித்து வருகின்றனர்.