கல்வராயன்மலையில் 1000 லிட்டர் சாராய ஊறல் அழிப்பு

கச்சிராயப்பாளையம்

கச்சிராயப்பாளையம் அருகே உள்ள கல்வராயன்மலை தும்பராம்பட்டு காட்டுக்கொட்டாய் ஓடையில் சாராய ஊறல் பதுக்கி வைத்து இருப்பதாக மாவட்ட போலீஸ் சூப்பிரண்டு செல்வகுமாருக்கு ரகசிய தகவல் கிடைத்தது. இதையடுத்து அவரது உத்தரவின் பேரில் கச்சிராயப்பாளையம் போலீஸ் சப்-இன்ஸ்பெக்டர் ராஜா தலைமையில் போலீசார் தும்பராம்பட்டு காட்டுக்கொட்டாய் ஓடைக்கு சென்று சோதனை நடத்தினர். 

அப்போது அங்கு சாராயம் காய்ச்சுவதற்காக 2 பிளாஸ்டிக் தண்ணீர் தொட்டிகளில் 1,000 லிட்டர் சாராய ஊறல் பதுக்கி வைத்திருந்ததை கண்டுபிடித்த போலீசார் அவற்றை தரையில் கொட்டி அழித்தனர். மேலும் இது தொடர்பாக வழக்குப்பதிவு செய்து சாராய ஊறலை பதுக்கி வைத்த மர்ம நபர்களை வலைவீசி தேடி வருகிறார்கள்.