வார்டு சீரமைப்புக்கு எதிர்ப்பு; வீடுகளில் கருப்புக்கொடி கட்டி பொதுமக்கள் போராட்டம்

களக்காடு:

களக்காடு அருகே, வார்டு சீரமைப்புக்கு எதிர்ப்பு தெரிவித்து வீடுகளில் கருப்புக்கொடி கட்டி திடீர் போராட்டத்தில் ஈடுபட்ட பொதுமக்கள், தேர்தலை புறக்கணிக்கப்போவதாக அறிவித்துள்ளனர்.

நெல்லை மாவட்டம் களக்காடு அருகே கீழப்பத்தை கிராமம் உள்ளது. இங்கு 950 வாக்காளர்கள் உள்ளனர். கடந்த தேர்தல் வரை கீழப்பத்தை தனி வார்டாக செயல்பட்டு வந்தது.

தற்போது களக்காடு பேரூராட்சி, நகராட்சியாக தரம் உயர்த்தப்பட்டதை அடுத்து வார்டுகள் மறுசீரமைப்பு செய்யப்பட்டது. இதில் தனி வார்டாக இருந்த கீழப்பத்தை 4 பகுதியாக பிரிக்கப்பட்டு, தனித்தனி வார்டுகளுடன் இணைக்கப்பட்டது. இதற்கு கிராம மக்கள் எதிர்ப்பு தெரிவித்து வருகின்றனர்.

வார்டு சீரமைப்பை மறுபரிசீலனை செய்து, 4 வார்டுகளுடன் இணைக்கப்பட்டதை ரத்து செய்து, மீண்டும் கீழப்பத்தையை ஒரே வார்டாக அறிவிக்கக்கோரி கிராம மக்கள் மாவட்ட கலெக்டர் மற்றும் தேர்தல் அதிகாரிகளுக்கு மனுக்கள் கொடுத்து வந்தனர். இதைத்தொடர்ந்து அதிகாரிகள் நடத்திய பேச்சுவார்த்தையில் உடன்பாடு ஏற்படவில்லை.

இன்று (சனிக்கிழமை) நகர்ப்புற உள்ளாட்சி தேர்தல் நடைபெற உள்ள நிலையில் நேற்று கீழப்பத்தை கிராம மக்கள் தங்களது வீடுகளில் கருப்புக்கொடிகளை கட்டி திடீர் போராட்டத்தில் ஈடுபட்டனர். கீழப்பத்தையை ஒரே வார்டாக அறிவிக்கக்கோரி உள்ளாட்சி தேர்தலை புறக்கணிக்கப் போவதாகவும், இன்று ஓட்டு போட செல்ல மாட்டோம் என்றும் அறிவித்துள்ளனர். இதனால் அப்பகுதியில் பரபரப்பு ஏற்பட்டுள்ளது.