<
மேலும் 6 மீனவர்களை இலங்கை கடற்படை சிறைபிடித்தது
இலங்கை கடற்படையால் ராமநாதபுரம் மாவட்டம் நம்புதாளையை சேர்ந்த 6 மீனவர்கள் சிறைபிடிக்கப்பட்டனர்.
தொண்டி,
இலங்கை கடற்படையால் ராமநாதபுரம் மாவட்டம் நம்புதாளையை சேர்ந்த 6 மீனவர்கள் சிறைபிடிக்கப்பட்டனர்.
நாட்டுப்படகு
ராமநாதபுரம் மாவட்டம் தொண்டி அருகே உள்ள நம்புதாளை படையாட்சி தெருவை சேர்ந்தவர் குமரேசன் (வயது 40). இவருக்கு சொந்தமான நாட்டுப்படகில் நேற்று முன்தினம் நம்புதாளை கிராமத்தை சேர்ந்த முத்துக்குமார் (32), பாலு(47), ரெங்கதுரை (48), கண்மாய்க்கரையான் (64), பூபதி (32), மனோஜ்குமார் (25) ஆகிய 6 மீனவர்கள் கடலுக்கு மீன்பிடிக்க சென்றனர்.
இவர்கள் கச்சத்தீவு அருகே நடுக்கடலில் மீன்பிடித்த போது அந்த பகுதியில் ரோந்து வந்த இலங்கை கடற்படையினர் நம்புதாளை மீனவர்கள் 6 பேரையும் எல்லைதாண்டி வந்து மீன்பிடித்ததாக சிறைபிடித்தனர். அவர்களது நாட்டு படகையும் பறிமுதல் செய்து கொண்டு சென்றனர்..
சிறையில் அடைப்பு
பின்னர் 6 மீனவர்களும் இலங்கையின் ஊர்க்காவல்துறை ேகார்ட்டில் ஆஜர்படுத்தப்பட்டனர். அவர்களிடம் விசாரணை நடத்திய நீதிபதி கஜநிதிபாலன், 6 பேரையும் வருகிற 4-ந்தேதி வரை காவலில் வைக்க உத்தரவிட்டதை தொடர்ந்து அவர்கள் யாழ்ப்பாணம் சிறையில் அடைக்கப்பட்டனர்.
ஏற்கனவே இலங்கை கடற்படையால் சிறைபிடிக்கப்பட்ட ராமேசுவரம் மீனவர்கள் 23 பேரும், நாகப்பட்டினம் மீனவர்கள் 21 பேரும் சிறையில் அடைக்கப்பட்டு உள்ள நிலையில் தற்போது மேலும் 6 பேர் சிறைபிடிக்கப்பட்டு இருப்பது மீனவர்கள் மத்தியில் அதிர்ச்சியை ஏற்படுத்தி உள்ளது. எனவே அனைத்து மீனவர்களையும் விடுவிக்க மத்திய, மாநில அரசுகள் நடவடிக்ைக எடுக்க வேண்டும் என்று மீனவ அமைப்புகள் கோரிக்கை விடுத்துள்ளன.
2-வது முறையாக படகு பறிமுதல்
இதுகுறித்து படகின் உரிமையாளர் குமரேசன் கூறியதாவது:-
சில ஆண்டுகளுக்கு முன்பு இலங்கை கடற்படை எனக்குச் சொந்தமான நாட்டு படகை பறிமுதல் செய்தது. கடந்த 2018-ம் ஆண்டு ஊர்க்காவல்துறை கோர்ட்டு அந்த படகை விடுவித்தது. ஆனால் இதுவரை எனக்கு அந்த படகை தமிழக அரசு மீட்டுத்தரவில்லை. இந்த சூழ்நிலையில் கடன் பெற்று மற்றொரு படகை வாங்கி தொழில் செய்து வந்தேன். மீண்டும் படகை இலங்கை கடற்படை பறிமுதல் செய்துவிட்டது. எனவே தமிழக அரசு உடனடியாக தலையிட்டு படகையும், கைது செய்யப்பட்ட நம்புதாளை மீனவர்களையும் உடனடியாக மீட்டுவர நடவடிக்கை எடுக்க வேண்டும்.
இவ்வாறு அவர் கூறினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
