நாற்று நடும் பணிகள் தீவிரம்

வத்திராயிருப்பு, 

வத்திராயிருப்பு பகுதியில் நாற்று நடும் பணிகள் தீவிரமாக நடைபெற்று வருகிறது. 

வத்திராயிருப்பு, கான்சாபுரம், கூமாப்பட்டி, இலந்தைகுளம், நெடுங்குளம், மகாராஜபுரம், தம்பிபட்டி, சுந்தரபாண்டியம், ஆயர்தர்மம், கோட்டையூர் மற்றும் அதன் சுற்றுவட்டார பகுதிகளில் நெல் விவசாயம் பிரதானமாக நடைபெற்று வருகிறது. 

வத்திராயிருப்பு தாலுகா பகுதியில் 7,400-க்கும் மேற்பட்ட ஏக்கரில் விவசாயிகள் நெல் சாகுபடியை செய்து வருகின்றனர். வத்திராயிருப்பு மற்றும் அதன் சுற்றுவட்டார பகுதிகளில் விவசாயிகள் தற்போது முதல்போக சம்பா சாகுபடி செய்து நெல் அறுவடை முடித்து இருந்தனர். இந்நிலையில் தற்போது கோடை கால நெல் சாகுபடி தொடங்கியுள்ளனர்.

இதுகுறித்து வத்திராயிருப்பு பகுதியை ேசர்ந்த விவசாயிகள் கூறியதாவது:- 

வத்திராயிருப்பு மற்றும் அதன் சுற்றுவட்டாரப் பகுதியில் தற்போது முதல்போக சம்பா நெல் அறுவடையை முடித்துவிட்டு கோடைகால நெல் சாகுபடியை தொடங்கி உள்ளோம். 

தற்போது நெல் நாற்றங்கால் பாவி, டிராக்டர் மூலம் உழவுத்தொழிலை மேற்கொண்டு, நடவு பணிகள் தீவிரமாக நடைபெற்று வருகிறது. கண்மாய்களில் நீர் உள்ளதால் தண்ணீர் பற்றாக்குறை இன்றி கோடை கால பருவ நெல் அறுவடையை நாங்கள் சிறப்பாக முடித்து அதிக லாபம் ஈட்ட முடியும் என்ற நம்பிக்கை உள்ளது. மேலும் மாவட்ட நிர்வாகம் விவசாயிகளின் செலவினங்களை குறைப்பதற்காக விவசாயிகளுக்கு மானிய விலையில் நடவு எந்திரங்கள் கொடுத்தல் பெரும் பயனாக அமையும்.

எனவே மாவட்ட நிர்வாகம் வத்திராயிருப்பு பகுதியில் உள்ள விவசாயிகள் நலனை கருத்தில் கொண்டு எந்திர நடவு செய்வதற்காக நடவு எந்திரத்தை மானிய விலையில் கொடுக்க நடவடிக்கை எடுக்க வேண்டும். 

இவ்வாறு அவர்கள் கூறினர்.