3 மையங்களில் வாக்கு எண்ணிக்கை

மயிலாடுதுறை:-

மயிலாடுதுறை மாவட்டத்தில் 3 மையங்களில் வாக்கு எண்ணிக்கை இன்று காலை 8 மணிக்கு தொடங்குகிறது.

இதுகுறித்து மாவட்ட கலெக்டர் லலிதா நேற்று நிருபர்களுக்கு பேட்டி அளித்தார். அப்போது அவர் கூறியதாவது:- 

மயிலாடுதுறை மாவட்டத்தில் உள்ள 2 நகராட்சிகள் மற்றும் 4 பேரூராட்சிகளுக்கான நகர்ப்புற உள்ளாட்சி தேர்தல் வாக்குப்பதிவு கடந்த 19-ந் தேதி நடந்தது. மயிலாடுதுறை நகராட்சியில் 19-வது வார்டு அ.தி.மு.க. வேட்பாளர் அன்னதாட்சி என்பவர் இறந்ததால் அங்கு தேர்தல் நடைபெறவில்லை. மேலும் தரங்கம்பாடி பேரூராட்சியில் 3 வார்டு உறுப்பினர்கள் போட்டியின்றி தேர்ந்தெடுக்கப்பட்டு விட்டனர். மொத்தம் 59 நகராட்சி வார்டு உறுப்பினர்களுக்கும், பேரூராட்சிகளில் 60 உறுப்பினர்களுக்கும் தேர்தல் நடந்தது. 

இந்த தேர்தலில் 65.81 சதவீதம் வாக்குகள் பதிவாகின. மயிலாடுதுறை நகராட்சிக்கு தருமபுரம் ஞானாம்பிகை அரசு பெண்கள் கல்லூரி, சீர்காழி நகராட்சிக்கு சீர்காழி சபாநாயக முதலியார் மேல்நிலைப் பள்ளி, குத்தாலம், மணல்மேடு, தரங்கம்பாடி, வைதீஸ்வரன்கோவில் ஆகிய 4 பேரூராட்சிகளுக்கு மயிலாடுதுறை தேசிய மேல்நிலைப்பள்ளி என 3 இடங்களில் வாக்கு எண்ணும் மையங்கள் அமைக்கப்பட்டு உள்ளன. இந்த வாக்கு எண்ணும் மையங்களில் இன்று (செவ்வாய்க்கிழமை) காலை 8 மணிக்கு வாக்கு எண்ணும் பணி தொடங்குகிறது. 

மின்னணு வாக்குப்பதிவு எந்திரத்தில் வாக்கு எண்ண தொடங்குவதற்கு முன்பு எந்த வார்டில், எந்த வாக்குச்சாவடிக்கு எண்ணப்படுகிறது என்ற விவரம் ஒலிபெருக்கி மூலம் அறிவிப்பு செய்யப்படும். ஒவ்வொரு சுற்றும் முடிந்தவுடன் அந்த சுற்றில் தேர்ந்தெடுக்கப்பட்டுள்ள வேட்பாளர்கள் விவரமும் ஒலிபெருக்கி மூலம் தேர்தல் நடத்தும் அலுவலரால் அறிவிக்கப்பட்டு, பின்னர் சான்றிதழ் வழங்கப்படும். 

ஒவ்வொரு சுற்று வாக்கு எண்ணிக்கை முடிந்தவுடன் வேட்பாளர்கள் பெற்ற வாக்குகள் தமிழ்நாடு தேர்தல் ஆணைய இணையதளத்தில் உடனுக்குடன் பதிவேற்றம் செய்யப்படும். இவ்வாறு அவர் கூறினார்.