ஏப்ரல் 1-ந் தேதி முதல் அமல்; பெங்களூருவில் 2 ‘ஸ்ட்ரோக்’ ஆட்டோக்களுக்கு தடை - கர்நாடக அரசு உத்தரவு

பெங்களூரு:

  பெங்களூரு நகரில் காற்று மற்றும் சுற்றுச்சூழல் பாதிப்பு ஏற்படுவதை தடுக்க அரசு பல்வேறு நடவடிக்கைகளை எடுத்து வருகிறது. இதற்காக அதிக புகையை வெளியிடும் வாகனங்களை பயன்படுத்தும் வாகன ஓட்டிகள் மீது போக்குவரத்து துறை அதிகாரிகள் நடவடிக்கை எடுத்து வருகின்றனர். அதுபோல், பெங்களூரு 2 ‘ஸ்ட்ரோக்’ என்ஜின்களை கொண்ட ஆட்டோக்களால் காற்று, சுற்றுச்சூழல் மாசுபடுவதால், அதற்கு தடை விதிக்க அரசு முடிவு செய்திருந்தது.

  ஆனால் கடந்த 2 ஆண்டுகளாக கொரோனா காரணமாக 2 ‘ஸ்ட்ரோக்’ என்ஜின்களை கொண்ட ஆட்டோக்கள் பயன்பாட்டுக்கு அனுமதி வழங்கப்பட்டு இருந்தது. இந்த நிலையில், வருகிற ஏப்ரல் 1-ந் தேதி முதல் பெங்களூருவில் 2 ‘ஸ்ட்ரோக்’ என்ஜின் ஆட்டோக்கள் இயக்குவதற்கு தடை விதித்து அரசு அதிரடி உத்தரவு பிறப்பித்துள்ளது. அதே நேரத்தில் ஏப்ரல் 1-ந் தேதியில் இருந்து 2 ‘ஸ்ட்ரோக்’ ஆட்டோக்களுக்கு எப்.சி. செய்ய கூடாது என்று போக்குவரத்து துறைக்கும், அரசு உத்தரவிட்டுள்ளது.

  ஏப்ரல் 1-ந்தேதிக்கு பிறகு 2 ‘ஸ்ட்ரோக்’ என்ஜின் ஆட்டோக்கள் இயக்கப்பட்டால், டிரைவர்களுக்கு அபராதம் விதிக்கப்பட உள்ளது. கொரோனாவுக்கு முன்பாகவே 4 ‘ஸ்ட்ரோக்’ என்ஜின் ஆட்டோக்களை வாங்கும்படி அரசு உத்தரவிட்டு இருந்தது. அத்துடன் 2 ‘ஸ்ட்ரோக்’ என்ஜின் ஆட்டோக்களை, 4 ‘ஸ்ட்ரோக்’ என்ஜின் மாற்றுவதற்காக ரூ.30 ஆயிரம் மானியம் வழங்கப்படும் என்று அரசு அறிவித்திருந்தது.

  தற்போது 2 ‘ஸ்ட்ரோக்’ என்ஜின் ஆட்டோக்கள் பெங்களூருவில் இயக்குவதற்கு தடை விதிக்கப்பட்டுள்ளதால், 10 ஆயிரத்திற்கும் மேற்பட்ட ஆட்டோ டிரைவர்கள் பாதிக்கப்படும் அபாயம் ஏற்பட்டுள்ளது.