சிவன் கோவில்களில் சிறப்பு வழிபாடு

ராஜபாளையம்,

மாவட்டத்தில் உள்ள சிவன் கோவில்களில் சிறப்பு வழிபாடு நடைபெற்றது. 

ராஜபாளையம் சொக்கர் என்ற மீனாட்சி சுந்தரேஸ்வரர் கோவில், மாயூரநாதர் சாமி கோவில், அருணாச்சலேஸ்வரர் கோவில், குருசாமி கோவில், பறவை அன்னம் காத்தருளிய சாமி கோவில்களில் பிரதோஷத்தையொட்டி சிறப்பு வழிபாடு நடைபெற்றது. முன்னதாக நந்திக்கு மஞ்சள், தேன், இளநீர், பால், தயிர், எலுமிச்சை, கரும்புச்சாறு, பன்னீர் உள்பட பல்வேறு பொருட்களால் சிறப்பு அபிஷேகம் நடந்தது. 

அதேபோல ராஜபாளையம் அருகே வாழவந்தாள்புரம் கிராமத்தில் மன்மத ராஜலிங்கேஸ்வரர் கோவில், தெற்கு வெங்கநல்லூர் சிதம்பரேஸ்வரர் கோவில், சோழபுரம் விக்கிரம பாண்டீஸ்வரர் கோவில்களிலும் நடைபெற்ற சிறப்பு பூஜையில் திரளான பக்தர்கள் கலந்து கொண்டு சாமி தரிசனம் செய்தனர். 

ஆலங்குளம் அருகே உள்ள சங்கரமூர்த்தி பட்டி சங்கரலிங்கசாமி, சிமெண்டு ஆலை காலனியில் உள்ள ஆகாய லிங்கேஸ்வரர், எதிர்கோட்டை சுனை கண்ட லிங்கேஸ்வரர், கண்மாய்பட்டி குபேர லிங்கசாமி ஆகிய சிவன் கோவில்களில் பிரதோஷத்தை முன்னிட்டு சிறப்பு பூஜைகள் நடைபெற்றது. 

முன்னதாக நந்திக்கு பால், தயிர், சந்தனம், இளநீர் உள்பட பல்வேறு வகையான பொருட்களால் அபிஷேகம் நடந்தது. தொடர்ந்து நந்தி மற்றும் சுவாமிக்கு சிறப்பு அலங்காரம் செய்யப்பட்டது. 

அதேபோல சிவகாசி சிவன் கோவில் உள்பட மாவட்டத்தில் பல்வேறு பகுதிகளில் உள்ள கோவில்களில் சிறப்பு வழிபாடு நடைபெற்றது.