கூரை வீடு தீப்பிடித்து எரிந்ததில் 4 ஆடுகள் சாவு

வேதாரண்யம்:-

வேதாரண்யம் அருகே கூரை வீடு தீப்பிடித்து எரிந்ததில் 4 ஆடுகள் பரிதாபமாக இறந்தன. 

நாகை மாவட்டம் வேதாரண்யம் அருகே உள்ள மருதூர் வடக்கு கிராமம் குட்டியாபிள்ளை கட்டளை பகுதியை சேர்ந்தவர் முத்துகுமார். மாற்றுத்திறனாளியான இவர் திருப்பூரில் வேலை பார்த்து வருகிறார். இவருடைய மனைவி அந்த பகுதியில் கூலி வேலைக்கு சென்று வருகிறார். 

இந்த நிலையில் நேற்று அவர் வேலைக்கு சென்ற நிலையில்  மதியம் 2 மணி அளவில் அவருடைய கூரை வீடு திடீரென தீப்பிடித்து எரிந்தது. இதில் வீட்டில் வளர்க்கப்பட்டு வந்த 4 ஆடுகள் தீயில் கருகி பரிதாபமாக இறந்தன. 

தீ மளமளவென பரவியதில் அருகில் இருந்த வைக்கோல் முழுவதும் எரிந்து நாசமானது. அங்கு இருந்த 2 மாடுகள் தீக்காயம் அடைந்தன. அவற்றுக்கு சிகிச்சை அளிக்கப்பட்டு வருகிறது. மேலும் வீடு முற்றிலும் எரிந்து நாசமானது. இதன் சேத மதிப்பு ரூ.1 லட்சத்து 50 ஆயிரம் இருக்கும் என கூறப்படுகிறது. முன்னதாக வாய்மேடு தீயணைப்பு வீரர்கள சம்பவ இடத்துக்கு சென்று தீ மேலும் பரவாமல் அணைத்தனர். 

தீ விபத்துக்கான காரணம் குறித்து கரியாப்பட்டினம் போலீசார் விசாரணை நடத்தி வருகிறார்கள். தீ விபத்தில் பாதிக்கப்பட்ட குடும்பத்துக்கு தாசில்தார் ரவிச்சந்திரன் மற்றும் வருவாய்த்துறையினர் அரசின் நிவாரண உதவிகளை வழங்கினர்.