அரியலூர், ஜெயங்கொண்டம் நகராட்சி கவுன்சிலர்கள் பதவி ஏற்பு

நடந்து முடிந்த நகர்ப்புற உள்ளாட்சி தேர்தலில் அரியலூர் மாவட்டம் அரியலூர் நகராட்சியில் உள்ள 18 வார்டுகளில் தி.மு.க. மற்றும் அதன் கூட்டணி கட்சியினர், அ.தி.மு.க, அ.ம.மு.க, தே.மு.தி.க, பா.ம.க, பாரதீய ஜனதா, நாம் தமிழர் கட்சி மற்றும் சுயேச்சைகள் என 89 பேர் போட்டியிட்டனர். இதில் தி.மு.க. 7 வார்டுகளிலும், அ.தி.மு.க. 7 வார்டுகளிலும், சுயேச்சைகள் 4 வார்டுகளிலும் வெற்றி பெற்றனர். தி.மு.க. சார்பில் போட்டியிட வாய்ப்பு கிடைக்காததால் 3 பேர் சுயேச்சையாக நின்று வெற்றி பெற்றனர். 

தி.மு.க.வும், அ.தி.மு.க.வும் சமபலம் பெற்றன. இதன் காரணமாக நகராட்சி தலைவர் பதவியை கைப்பற்றப்போவது யார்? என்ற பரபரப்பு நிலவியது. இந்தநிலையில் அரியலூர் மாவட்ட தி.மு.க. செயலாளரும், பிற்பட்டோர் நலத்துறை அமைச்சருமான சிவசங்கரை 3 சுயேச்சைகள் சந்தித்து தி.மு.க.விற்கு தங்களது ஆதரவை தெரிவித்ததால் நகராட்சி பதவியை தி.மு.க. கைப்பற்றியது.

 இந்தநிலையில் அரியலூர் நகராட்சியில் வெற்றி பெற்ற 18 கவுன்சிலர்களும் நகராட்சி அலுவலகத்தில் நேற்று பதவி ஏற்றுக் கொண்டனர். நகராட்சி ஆணையர் அவர்களுக்கு பதவிப்பிரமாணம் செய்து வைத்தார். முதலில், தி.மு.க கவுன்சிலர்கள் 10 பேர் பதவி ஏற்றனர். பின்னர், சுயேச்சை மற்றும் அ.தி.மு.க. கவுன்சிலர்கள் 7 பேர் பதவி ஏற்றுக் கொண்டனர்.