மாணவ, மாணவிகளுக்கான விளையாட்டு போட்டிகள்

பெரம்பலூர்:

தமிழக பிற்படுத்தப்பட்டோர் மற்றும் சிறுபான்மையினர் நலத்துறை சார்பில் பெரம்பலூரில், மாவட்ட அளவிலான பள்ளி, கல்லூரி விடுதி மாணவ-மாணவிகளுக்கான கலைத்திருவிழாவான இலக்கிய மற்றும் விளையாட்டு போட்டி நேற்று நடந்தது. பெரம்பலூரில் உள்ள மாவட்ட விளையாட்டு மைதானத்தில் பள்ளி, கல்லூரி விடுதி மாணவ-மாணவிகளுக்கு நடந்த 400 மீட்டர் ஓட்டப்பந்தயம் மற்றும் நீளம் தாண்டுதல் ஆகிய விளையாட்டு போட்டிகளையும், இலக்கிய போட்டிகளான பேச்சு போட்டி, கட்டுரை போட்டியையும்  மாவட்ட பிற்படுத்தப்பட்டோர் மற்றும் சிறுபான்மையினர் நலத்துறை அலுவலர் ரமணகோபால் தொடங்கி வைத்தார். போட்டிகள் 6 முதல் 9-ம் வகுப்பு வரையிலான மாணவ-மாணவிகளுக்கும், 10 முதல் 12-ம் வகுப்பு வரையிலான மாணவ-மாணவிகளுக்கும், கல்லூரி மாணவ-மாணவிகளுக்கும் என தனித்தனியாக நடைபெற்றது. இதில் மாவட்டத்தில் உள்ள 34 பிற்படுத்தப்பட்டோர் மற்றும் சிறுபான்மையினர் பள்ளி, கல்லூரி விடுதிகளை சேர்ந்த சுமார் 400-க்கும் மேற்பட்ட மாணவ-மாணவிகள் கலந்து கொண்டு தங்களது திறமைகளை வெளிப்படுத்தினர். போட்டிகளில் முதல் மூன்று இடங்களை பிடித்த மாணவ-மாணவிகளுக்கு வெகுமதியும், பதக்கங்களும், பாராட்டு சான்றிதழும் வழங்கப்பட்டது. வெற்றி பெற்ற மாணவ-மாணவிகள் மாநில அளவிலான போட்டிகளில் பங்கேற்கவுள்ளனர் என்பது குறிப்பிடத்தக்கது. இதற்கான ஏற்பாடுகளை விடுதி காப்பாளர்கள், பயிற்சியாளர்கள், உடற்கல்வி ஆசிரியர்கள், பணியாளர்கள் செய்திருந்தனர்.