மஞ்சள் குவிண்டால் ரூ.10,629-க்கு விற்பனை; விவசாயிகள் மகிழ்ச்சி

ஈரோடு

ஈரோட்டில் மஞ்சள் விலை உயர்ந்து குவிண்டால் ரூ.10 ஆயிரத்து 629-க்கு விற்பனை ஆனதால் விவசாயிகள் மகிழ்ச்சி அடைந்துள்ளனர். 

ஈரோடு மாவட்டத்தில் தான் பல்லாயிரக்கணக்கான ஏக்கரில் மஞ்சள் சாகுபடி செய்யப்பட்டு  இருந்தது. இந்த மஞ்சள் கடந்த ஒரு மாதமாக அறுவடை செய்யப்பட்டு, ஈரோடு மாவட்டத்தில் உள்ள 4 மஞ்சள் மார்க்கெட்டுகளுக்கு விற்பனைக்காக கொண்டு வரப்படுகிறது. 

இந்த நிலையில் நேற்று பெருந்துறை ஒழுங்குமுறை விற்பனை கூடத்திற்கு 779 மஞ்சள் மூட்டைகளை விவசாயிகள் விற்பனைக்கு கொண்டு வந்திருந்தனர். இதில் விரலி மஞ்சள் குவிண்டால் ஒன்று குறைந்தபட்சமாக ரூ.5 ஆயிரத்து 619-க்கும், அதிகபட்சமாக ரூ.8 ஆயிரத்து 289-க்கும், கிழங்கு மஞ்சள் குவிண்டால் ஒன்று குறைந்தபட்சமாக ரூ.5 ஆயிரத்து 389-க்கும், அதிகபட்சமாக ரூ.7 ஆயிரத்து 559-க்கும் விற்பனை ஆனது. மொத்தம் 599 மஞ்சள் மூட்டைகள் ஏலம் போனது.

ஈரோடு ஒழுங்கு முறை விற்பனை கூடத்திற்கு 5 ஆயிரத்து 667 மஞ்சள் மூட்டைகள் விற்பனைக்கு வந்தன. இதில் விரலி மஞ்சள் குவிண்டால் குறைந்தபட்சமாக ரூ.7 ஆயிரத்து 399-க்கும், அதிகபட்சமாக ரூ.9 ஆயிரத்து 699-க்கும், கிழங்கு மஞ்சள் குறைந்தபட்சமாக ரூ.6 ஆயிரத்து 699-க்கும், அதிகபட்சமாக ரூ.8 ஆயிரத்து 439-க்கும் ஏலம் போனது. 3 ஆயிரத்து 610 மஞ்சள் மூட்டைகள் விற்பனை ஆனது.

ஈரோடு வேளாண்மை உற்பத்தியாளர்கள் கூட்டுறவு விற்பனை கூடத்திற்கு 814 மஞ்சள் மூட்டைகளை விவசாயிகள் விற்பனைக்காக கொண்டு வந்திருந்தனர். இதில் விரலி மஞ்சள் குவிண்டால் ஒன்று குறைந்தபட்சமாக ரூ.7 ஆயிரத்து 594-க்கும், அதிகபட்சமாக ரூ.8 ஆயிரத்து 699-க்கும், கிழங்கு மஞ்சள் குறைந்தபட்சமாக ரூ.6 ஆயிரத்து 699-க்கும், அதிகபட்சமாக ரூ.7 ஆயிரத்து 739-க்கும் விற்பனையானது. விவசாயிகள் கொண்டு வந்ததில் 534 மூட்டை மஞ்சள் ஏலம் போனது. கோபி வேளாண்மை உற்பத்தியாளர்கள் கூட்டுறவு விற்பனை சங்கத்திற்கு 241 மஞ்சள் மூட்டைகள் விற்பனைக்கு வந்தன. இதில் விரலி மஞ்சள் குவிண்டால் ஒன்று குறைந்தபட்சமாக ரூ.7 ஆயிரத்து 399-க்கும், அதிகபட்சமாக ரூ.10 ஆயிரத்து 629-க்கும், கிழங்கு மஞ்சள் குறைந்தபட்சமாக ரூ.7 ஆயிரத்து 589-க்கும், அதிகபட்சமாக ரூ.7 ஆயிரத்து 939-க்கும் ஏலம் போனது. 199 மஞ்சள் மூட்டைகள் விற்பனையானது. மஞ்சள் விலை நேற்று உயர்ந்ததால் விவசாயிகள் மகிழ்ச்சி அடைந்துள்ளனர். எனினும் பழைய மஞ்சள் விலையில் மாற்றம் இல்லை.