கார் மோதி முதியவர் உள்பட 2 பேர் படுகாயம்

குளித்தலை அருகே உள்ள சரளைதோட்டம் பகுதியைச் சேர்ந்தவர் பழனியாண்டி (வயது 70), கூலித்தொழிலாளி. இவர் நேற்று முன்தினம் குளித்தலை அருகே திம்மாச்சிபுரம் பகுதியில் உள்ள தனது மகள் வீட்டுக்கு சென்றுள்ளார். பின்னர் மீண்டும் தனது ஊருக்கு செல்வதற்காக  உறவினரான அசோக் (36) என்பவருடன் மோட்டார் சைக்கிளில் சென்று கொண்டிருந்தார். குளித்தலை நாரப்பாளையம் பகுதியில் தேசிய நெடுஞ்சாலை அருகே சென்றுகொண்டிருந்தபோது, எதிரே வந்த கார் ஒன்று மோட்டார் சைக்கிள் மீது மோதியது. இதில் படுகாயம் அடைந்த 2 பேரையும் அந்த வழியாக சென்றவர்கள் மீட்டு குளித்தலை அரசு மருத்துவமனைக்கு அனுப்பி வைத்தனர். அங்கு முதலுதவி சிகிச்சை பெற்ற பழனியாண்டி மேல்சிகிச்சைக்காக தோகைமலையில் உள்ள தனியார் மருத்துவமனையில்  அனுமதிக்கப்பட்டுள்ளார். அசோக் முதலுதவி சிகிச்சை பெற்று வீடு திரும்பினார். இந்த விபத்து குறித்து பழனியாண்டி அளித்த புகாரின் பேரில் குளித்தலை போலீசார் வழக்குப்பதிவு செய்து விசாரணை நடத்தி வருகின்றனர்.