தூத்துக்குடியில் ரூ 1,000 கோடியில் சர்வதேச பர்னிச்சர் பூங்கா: முதல்-அமைச்சர் மு.க.ஸ்டாலின் அடிக்கல் நாட்டினார்

தூத்துக்குடியில் ரூ.1,000 கோடியில் அமைய உள்ள சர்வதேச பர்னிச்சர் பூங்காவுக்கு முதல்-அமைச்சர் மு.க.ஸ்டாலின் அடிக்கல் நாட்டினார்.

சிப்காட் நிறுவனம் சார்பில் தூத்துக்குடி சிப்காட் தொழில்பேட்டை வளாகத்தில் 1,156 ஏக்கர் பரப்பளவில் ரூ.1,000 கோடியில் சர்வதேச அறைகலன் பூங்கா (பர்னிச்சர் பார்க்) அமைப்பதற்கான அடிக்கல் நாட்டு விழா தூத்துக்குடியில் உள்ள தனியார் திருமண மண்டபத்தில் நேற்று நடந்தது. விழாவுக்கு தமிழக தொழில் துறை அமைச்சர் தங்கம் தென்னரசு தலைமை தாங்கினார். தூத்துக்குடி நாடாளுமன்ற தொகுதி உறுப்பினர் கனிமொழி, தமிழக வருவாய் மற்றும் பேரிடர் மேலாண்மை துறை அமைச்சர் கே.கே.எஸ்.எஸ்.ஆர்.ராமச்சந்திரன், குறு, சிறு, நடுத்தர தொழில்கள் துறை அமைச்சர் தா.மோ.அன்பரசன், சமூக நலன் மற்றும் மகளிர் உரிமைத்துறை அமைச்சர் கீதாஜீவன், மீன்வளம், மீனவர் நலன் மற்றும் கால்நடை பராமரிப்புத் துறை அமைச்சர் அனிதா ராதாகிருஷ்ணன் ஆகியோர் முன்னிலை வகித்தனர். தொழில் துறை கூடுதல் தலைமை செயலாளர் கிருஷ்ணன் வரவேற்று பேசினார். 

சிறப்பு அழைப்பாளராக தமிழக முதல்-அமைச்சர் மு.க.ஸ்டாலின் கலந்து கொண்டு சர்வதேச பர்னிச்சர் பூங்காவுக்கு அடிக்கல் நாட்டினார். தொடர்ந்து சர்வதேச பர்னிச்சர் பூங்காவில் முதலீடு செய்ய முன்வந்துள்ள 8 நிறுவனங்களுடன் புரிந்துணர்வு ஒப்பந்தங்கள் மேற்கொள்ளப்பட்டு, முதல்-அமைச்சர் மு.க.ஸ்டாலின் முன்னிலையில் அதிகாரிகள் மற்றும் நிறுவனங்களின் பிரதிநிதிகள் ஒப்பந்த நகல்களை பரிமாறிக் கொண்டனர்.

வேலைவாய்ப்பு

மேலும், தமிழக அரசின் தொழில் வழிகாட்டு நிறுவனத்தின் புதிய இணையதளத்தையும், தமிழ்நாடு நிலத்தகவல் இணையத்தையும் முதல்-அமைச்சர் மு.க.ஸ்டாலின் தொடங்கி வைத்தார். மரச்சாமான் மற்றும் தோல் பொருட்களால் பர்னிச்சர் பொருட்கள் உற்பத்தி செய்யவுள்ள இந்த 8 நிறுவனங்கள் மூலம் ரூ.2 ஆயிரத்து 845 கோடி முதலீடும், 11 ஆயிரத்து 450 பேருக்கு வேலைவாய்ப்பும் கிடைக்கும் என தெரிவிக்கப்பட்டு உள்ளது.

மேலும், சர்வதேச அறைகலன் பூங்காவில் தங்களது உற்பத்தி திட்டங்களை செயல்படுத்த முன்வந்துள்ள ஹெட்டிச் இந்தியா லிமிடெட் மற்றும் டெக்யூனிக் புரொபைல்ஸ் இந்தியா லிமிடெட் ஆகிய 2 நிறுவனங்களுக்கு நில ஒதுக்கீடு ஆணைகளை முதல்-அமைச்சர் மு.க.ஸ்டாலின் வழங்கினார். விழாவில் முதல்-அமைச்சர் மு.க.ஸ்டாலின் பேசியதாவது:-

தமிழகத்தில் ஆட்சி மாற்றம் ஏற்பட்டு 10 மாதங்கள் முடிந்து உள்ளது. பொறுப்பேற்ற நாள் முதல், இன்னும் சொல்லவேண்டும் என்றால் தேர்தல் முடிவுகள் வெளிவந்து கொண்டு இருக்கும் போதே, அரசு பணியை தொடங்கி இருக்கிறோம்.

நாள்தோறும் ஏதாவது திட்டத்தை தொடங்கி வைக்கிறோம். தமிழக இளைஞர்களுக்கு வேலைவாய்ப்பு வழங்கும் வகையில் ஏதாவது ஒரு தொழில்நிறுவனத்தை தொடங்கி வைத்துக் கொண்டு இருக்கிறோம்.

சர்வதேச அறைகலன் பூங்கா இந்தியாவில் முதன் முறையாக தூத்துக்குடியில் தொடங்கப்படுகிறது. இந்தியாவின் தென்பகுதியில் உள்ள தூத்துக்குடி மாவட்டத்தில், முத்துநகரில், விடுதலை போராட்ட வீரர்கள் பிறந்த மண்ணில் இந்த பூங்கா அமைகிறது. சொந்த தேசத்தில், சொந்த பணத்தில், சுய சார்பு பொருளாதாரத்தை நாம் உருவாக்கி கொள்ள வேண்டும் என்று கனவு கண்டவர் வ.உ.சி., அவரது பொருளாதார கனவு நிறைவேறும் நாளாக இது அமைந்து உள்ளது.

கிராமங்கள் நகரமாக வேண்டும், நகரங்கள் மாநகரமாக வேண்டும் என்பது தான் அரசின் கொள்கை. அந்த அடிப்படையில் தூத்துக்குடி மாநகராட்சி அறிவிக்கப்பட்டது. ஏராளமான திட்டங்களை தூத்துக்குடிக்கு கொடுக்க வேண்டும் என்பதற்காக மாநகராட்சியாக கலைஞர் அறிவித்தார். அந்த வரிசையில் இந்த சர்வதேச அறைகலன் பூங்கா அமைக்க உள்ளோம்.

தூத்துக்குடி மாவட்டத்தை தேர்வு செய்வதற்கு முக்கிய காரணமும் உண்டு. தென் தமிழகத்தில் மக்களுக்கு வேலைவாய்ப்பை உருவாக்கி, மக்களுக்கு வாழ்வாதாரத்தை ஏற்படுத்தி, பொருளாதாரத்தை மேம்படுத்தும் நோக்கத்தில் தூத்துக்குடியில் இந்த பூங்கா அமைக்கப்படும். தென்கிழக்கு ஆசிய நாடுகள், ஆஸ்திரேலியா, நியூசிலாந்து ஆகிய நாடுகளில் இருந்தும் வரும் கப்பல்களுக்கு இந்தியாவின் நுழைவு வாயிலாக தூத்துக்குடி துறைமுகம் விளங்கி கொண்டு இருக்கிறது. இதனால் தூத்துக்குடியில் இந்த பூங்காவை அமைக்க முடிவு செய்து உள்ளோம்.

கொரோனா என்ற பெருந்தொற்றில் இருந்து இன்னும் சில மாநிலங்கள் மீளவில்லை. கொரோனா காரணமாக இழந்த பொருளாதாரத்தை சில மாநிலங்கள் இன்னும் மீட்டெடுக்க முடியவில்லை. கொரோனாவில் இருந்து மீண்டது மட்டுமின்றி பொருளாதாரத்தையும் மேம்பாடு அடைய வைக்க தமிழக அரசு முழுமையாக ஈடுபடுத்திக் கொண்டு இருக்கிறது. இதனால் மாநிலத்தின் பொருளாதார வளர்ச்சி கடந்த 10 மாதங்களாக சீராக இருந்து வருகிறது. இது மகிழ்ச்சியை அளிக்கிறது.

வறுமையை ஒழித்தல், வேலைவாய்ப்பு உருவாக்குதல், சுற்றுச்சூழல் பாதுகாத்தல், சமூகநீதியை பாதுகாத்தல் ஆகிய நோக்கங்களோடு, அனைவரையும் உள்ளடக்கிய பரவலான வளர்ச்சி என்ற திராவிட மாடல் இலக்கை நோக்கி பயணித்து வருகிறோம். மாநிலத்தின் மகத்தான வளங்களை முழுமையாக பயன்படுத்தி, தொழில் வளர்ச்சியை உயர்த்தி, தமிழ் மக்கள் அனைவருக்கும் சிறப்பான வாழ்க்கையை உருவாக்குவது அரசின் குறிக்கோள், லட்சியம்.

இதுவரை மூன்று முதலீட்டாளர்கள் மாநாட்டை நடத்தி உள்ளோம். இதில் மேற்கொள்ளப்பட்ட புரிந்துணர்வு ஒப்பந்தங்கள் நம் மாநிலத்தின் மீது, முதலீட்டாளர்கள் வைத்து உள்ள நம்பிக்கையை எடுத்துக்காட்டுகிறது. இதுவரை 109 திட்டங்களுக்கு புரிந்துணர்வு ஒப்பந்தங்கள் கையெழுத்தாகி உள்ளது.

இவற்றில் உறுதி செய்யப்பட்ட ரூ.56 ஆயிரத்து 201 கோடி முதலீட்டின் மூலம் 1 லட்சத்து 74 ஆயிரத்து 999 பேருக்கு வேலைவாய்ப்பு கிடைக்கும்.

தென்மாவட்டங்களை தொழில்வளமாக்க அரசு பல்வேறு திட்டங்களை செயல்படுத்தி வருகிறது. தூத்துக்குடி, நெல்லை, விருதுநகர், ராமநாதபுரம், தேனி, சிவகங்கை ஆகிய மாவட்டங்களில், தொழில் முனைவோரை ஊக்குவிக்கும் வகையில் புதிய தொழில் பூங்காக்கள் அமைக்க நடவடிக்கை எடுக்கப்பட்டு வருகிறது.

இன்றைய காலச்சூழலுக்கு அறைகலன் பூங்கா மிகவும் அவசியமான திட்டம் ஆகும். உலக அளவில் அறைகலன் மரச்சாமான்கள் சந்தை 2020-21-ம் ஆண்டுக்குள் 750-800 மில்லியன் டாலர் அளவுக்கு பரந்து விரிந்து இருக்கும் என்று வல்லுனர்களால் கணக்கிடப்படுகிறது. இந்த தொழிலில் சீனா, வியட்நாம் போன்ற நாடுகள் முன்னணியில் உள்ளன. ஆனால், இந்தியாவின் பங்களிப்பு குறைவாக உள்ளது. இந்த குறைபாட்டை போக்கும் வகையில் தமிழக அரசு இந்த பூங்காவை அமைத்து உள்ளது. உலகத்தரத்துக்கு இணையாக ஒரு சர்வதேச அறைகலன் பூங்காவை உருவாக்க தமிழக அரசு முன்வந்து உள்ளது. அனைத்து துறைகளிலும் தமிழ்நாடு நம்பர் ஒன் (முதல் இடம்) என்ற நிலையை அடையப்போகிறது.

இவ்வாறு அவர் கூறினார்.

கலந்து கொண்டவர்கள்

விழாவில் தூத்துக்குடி மாநகராட்சி மேயர் ஜெகன் பெரியசாமி, தூத்துக்குடி மாவட்ட கலெக்டர் செந்தில் ராஜ், எம்.எல்.ஏ.க்கள் ஜி.வி.மார்க்கண்டேயன், எம்.சி.சண்முகையா, ஊர்வசி எஸ்.அமிர்தராஜ், வழிகாட்டி நிறுவனத்தின் மேலாண்மை இயக்குனர் மற்றும் செயல் துணைத்தலைவர் பூஜா குல்கர்னி, தொழில் வணிக ஆணையர் சிஜி தாமஸ் வைத்யன்,

தமிழ்நாடு தொழில் முன்னேற்ற நிறுவனத்தின் செயல் இயக்குனர் நிஷாந்த் கிருஷ்ணா, மத்திய அரசின் தொழில் மற்றும் உள்நாட்டு வர்த்தக மேம்பாட்டுத் துறையின் ஸ்கேல் கமிட்டி தலைவர் பவன் கோயங்கா, ராம்கோ குழுமத்தின் தலைவர் வெங்கட்ராம ராஜா மற்றும் தொழில் நிறுவனங்களின் பிரதிநிதிகள், வெளிநாட்டு தூதரக அதிகாரிகள், உள்ளாட்சி பிரதிநிதிகள் மற்றும் அரசு உயர் அதிகாரிகள் கலந்து கொண்டனர்.