தகராறை தட்டிக்கேட்ட லாரி டிரைவர் அடித்துக்கொலை

பணகுடி:

நெல்லை மாவட்டம் பணகுடி வடக்கு பகுதியில் பெட்ரோல் பங்க் உள்ளது. இங்கு நேற்று முன்தினம் இரவு பணகுடி கோரி காலனியைச் சேர்ந்த மணீஷ்ராஜா என்பவர் மோட்டார் சைக்கிளுக்கு பெட்ரோல் போட வந்தார். 

அப்போது, பங்க்கில் இருந்த ஊழியர், லாரியில் இருந்து பெட்ரோல் இறக்கிக் கொண்டு இருந்தார். இதனால் மணீஷ்ராஜாவிடம் பெட்ரோல் போடுவதற்கு சிறிது நேரம் ஆகும் என்று ஊழியர் தெரிவித்தார். இதனால் ஆத்திரம் அடைந்த மணீஷ்ராஜா அந்த ஊழியரிடம் தகராறில் ஈடுபட்டார்.

இதுகுறித்து அவர் தனது தந்தை பாலசுப்பிரமணியனிடம் (வயது 50)  தெரிவித்தார். உடனடியாக அவர் அதே ஊரைச் சேர்ந்த செல்லத்துரை மகன் ஆட்டோ குமார் (28), மூக்காண்டி மகன் சிவராமன் (30) ஆகியோரை அழைத்துக் கொண்டு பெட்ரோல் பங்க்கிற்கு சென்றார். அவர்கள் 4 பேரும் சேர்ந்து ஊழியரிடம் தகராறில் ஈடுபட்டனர். 

அந்த சமயத்தில் பணகுடி கரையடி காலனியைச் சேர்ந்த துைரராஜ் மகன் லாரி டிரைவரான கலைச்செல்வன் (33) என்பவர் மோட்டார் சைக்கிளுக்கு பெட்ரோல் போடுவதற்கு வந்தார். அவர் அங்கு நடந்த தகராறை தடுக்க முயன்று, தட்டிக் கேட்டதாக கூறப்படுகிறது. அந்த சமயத்தில் பாலசுப்பிரமணியன் கீழே விழுந்தார். கலைச்செல்வன் தான் தள்ளிவிட்டதாக நினைத்த மணீஷ்ராஜா, ஆட்டோ குமார், சிவராமன் ஆகியோர் சேர்ந்து அவரை சரமாரியாக தாக்கியதாக கூறப்படுகிறது. 

மேலும் பாலசுப்பிரமணியனும் தாக்கியதாக தெரிகிறது. இதில் தலையில் பலத்த காயம் அடைந்த கலைச்செல்வன் காது வழியாக ரத்தம் கொட்டியது.

உடனடியாக அங்கு இருந்தவர்கள் கலைச்செல்வனை மீட்டு பணகுடி அரசு ஆஸ்பத்திரிக்கு கொண்டு சென்றனர். அங்கு பரிசோதித்த டாக்டர்கள், கலைச்செல்வன் ஏற்கனவே இறந்து விட்டதாக தெரிவித்தனர்.

இதுகுறித்து தகவல் அறிந்த பணகுடி போலீசார் சம்பவ இடத்திற்கு சென்று விசாரணை நடத்தினார்கள். இந்த கொலை தொடர்பாக போலீசார் வழக்குப்பதிவு செய்து, பாலசுப்பிரமணியன், ஆட்டோகுமார், சிவராமன் ஆகிய 3 பேரை கைது செய்து விசாரணை நடத்தி வருகிறார்கள். மேலும் தப்பி ஓடிய மணீஷ்ராஜாவை போலீசார் வலைவீசி தேடி வருகிறார்கள்.

இதற்கிடையே, கலைச்செல்வனை தாக்கும் காட்சிகள் பெட்ரோல் பங்க்கில் இருந்த கண்காணிப்பு கேமராவில் பதிவாகி இருந்தது. இந்த காட்சிகள் தற்போது சமூக வலைத்தளங்களில் பரவி வருகிறது. இந்த கொலை தொடர்பாக கண்காணிப்பு கேமரா காட்சிகள் மூலமாக 3 பேரையும் போலீசார் உடனடியாக கைது செய்தது குறிப்பிடத்தக்கது.

பெட்ரோல் பங்க்கில் நடந்த தகராறை தட்டிக்கேட்ட லாரி டிரைவர் அடித்துக்கொலை செய்யப்பட்ட சம்பவம் பரபரப்பை ஏற்படுத்தி உள்ளது.