போட்டிகளில் வெற்றி பெற்ற மாணவ-மாணவிகளுக்கு பரிசு

பெரம்பலூர் மாவட்ட கலெக்டர் அலுவலகத்தில் மக்கள் குறை தீர்க்கும் நாள் கூட்டம் கலெக்டர் ஸ்ரீவெங்கடபிரியா தலைமையில் நடைபெற்றது. கூட்டத்தில், முதியோர் உதவித்தொகை, மாற்றுத் திறனாளிகள் உதவித் தொகை, தொழில் தொடங்க கடனுதவி, வீட்டுமனைப்பட்டா, விதவை உதவித்தொகை, ஆதரவற்றோர் உதவித்தொகை, பட்டா மாறுதல், கல்விக்கடன், இலவச தையல் எந்திரம் உள்பட பல்வேறு கோரிக்கைகளை வலியுறுத்தி 193 மனுக்கள் பொதுமக்களிடம் இருந்து பெறப்பட்டன. அந்த மனுக்கள் மீது நடவடிக்கை எடுக்குமாறு அரசுத்துறை அலுவலர்களுக்கு கலெக்டர் அறிவுறுத்தினார்.

பின்னர், மாவட்ட அளவில் சிறுசேமிப்புத் துறையின் சார்பில் நடைபெற்ற உலக சிக்கன நாள் விழா போட்டிகளில் வெற்றி பெற்ற பள்ளி மாணவ- மாணவிகள் 36 பேருக்கு பரிசுகள் மற்றும் சான்றிதழ்களையும், 2020-21-ம் ஆண்டில் சிறுசேமிப்பில் மாவட்ட அளவில் சிறப்பாக சேவை புரிந்த 6 முகவர்களுக்கு கேடயம் மற்றும் பரிசுத் தொகையையும், 10 திருநங்கைகளுக்கு மின்னணு அடையாள அட்டைகளையும் கலெக்டர் வழங்கினார். இதில், மாவட்ட வருவாய் அலுவலர் அங்கையற்கண்ணி, ஊரக வளர்ச்சி முகமை திட்ட இயக்குனர் லலிதா, ஊராட்சிகள் உதவி இயக்குனர் பாரதிதாசன் உள்பட அரசு அலுவலர்கள் பலர் கலந்து கொண்டனர்.