மயிலம் முருகன் கோவிலில் பங்குனி உத்திரவிழா கொடியேற்றத்துடன் நேற்று தொடங்கியது

மயிலம்

திருமணக்கோலத்தில் முருகன்

விழுப்புரம் மாவட்டம் மயிலத்தில் மலை மீது பிரசித்தி பெற்ற முருகன் கோவில் உள்ளது. இக்கோவிலில் முருகப்பெருமான் வள்ளி தெய்வானையுடன் திருமணக்கோலத்தில் காட்சி அளித்து வருகிறார். இங்கு ஆண்டுதோறும் பங்குனி உத்திர திருவிழா வெகு விமரிசையாக நடைபெறுவது வழக்கம்.

அதன்படி இந்த ஆண்டுக்கான விழா நேற்று தொடங்கியது. முன்னதாக அதிகாலையில் கோவில் நடை திறக்கப்பட்டு மூலவர் முருகனுக்கு பால், தயிர், இளநீர், சந்தனம் போன்ற பல்வேறு வகையான பொருட்களால் அபிஷேகம் செய்யப்பட்டது. இதையடுத்து தங்க கவசம் சாற்றி மலர் அலங்காரத்தில் வள்ளி, தெய்வானையுடன் முருகப்பெருமான் பக்தர்களுக்கு அருள்பாலித்தார். தொடர்ந்து உற்சவ மூர்த்திகளுக்கு அபிஷேக, அலங்காரம் நடைபெற்றது. 

கொடியேற்றம்

பின்னர் காலை 7 மணி அளவில் வள்ளி, தெய்வானையுடன் வெள்ளி கவசத்தில் விநாயகர், சண்டிகேஸ்வரர் பல்லக்கில் அங்குள்ள கொடிமரம் முன்பு எழுந்தருளினர். தொடர்ந்து  கொடிமரத்துக்கு சிறப்பு அபிஷேகம் நடைபெற்றது. 

காலை 7.15 மணிக்கு அர்ச்சகர்கள் வேத மந்திரங்கள் முழங்க மயிலம் பொம்மபுர ஆதீனத்தின் 20-ம் பட்ட சிவஞான பாலய சுவாமிகள் மயில் உருவம் பொறிக்கப்பட்ட துவஜா யோகம் என்னும் கொடியை ஏற்றினார். அப்போது அங்கு கூடியிருந்த பக்தர்கள் கந்தனுக்கு அரோகரா! முருகனுக்கு அரோகரா! என்று பக்தி கோஷங்களை எழுப்பி சாமி தரிசனம் செய்தனர். பின்னர் கொடிமரத்துக்கு மகாதீபாராதனை காண்பிக்கப்பட்டது. 

விழாவில் ஏராளமான பக்தர்கள் கலந்து கொண்டு சாமி தரிசனம் செய்தனர். இரவு சூரியபிரபை வாகனத்தில் வள்ளி தெய்வானையுடன் முருகன் எழுந்தருளியதும் மலைவலக்காட்சி நடைபெற்றது. 

திருக்கல்யாணம்

2-ம் நாள் விழாவான இன்று (வியாழக்கிழமை) இரவு ஆட்டுக்கிடா வாகனத்திலும், 3-ம் நாள் விழாவான நாளை (வெள்ளிக்கிழமை) இரவு பூதவாகனத்திலும், 4-ம் நாள் விழாவான நாளை மறுநாள் (சனிக்கிழமை) நாக வாகனத்திலும், வருகிற 13-ந்தேதி தங்க மயில் வாகனத்திலும், 14-ந்தேதி யானை வாகனத்திலும், 15-ந்தேதி வெள்ளிமயில் வாகனத்திலும், 16-ந்தேதி இரவு திருக்கல்யாணமும், அதைத் தொடர்ந்து வெள்ளி குதிரை வாகனத்தில் மலைவல காட்சியும் நடக்கிறது. 

தேரோட்டம்

விழாவின் சிகர நிகழ்ச்சியாக வருகிற 17-ந் தேதி (வியாழக்கிழமை) பங்குனி உத்திரத்தன்று அதிகாலை 5.45 மணிக்கு தேரோட்டம் நடக்கிறது. 

இதைத் தொடர்ந்து 18-ந் தேதி தெப்ப உற்சவமும், 19-ந்தேதி முத்து பல்லக்கு உற்சவமும், 20-ந் தேதி சண்டிகேஸ்வரர் உற்சவமும் நடக்கிறது. இதற்கான ஏற்பாடுகளை மயிலம் பொம்மபுர ஆதீனம் சிவஞான பாலய சுவாமிகள் செய்து வருகிறார்.