மத்தூர், தேன்கனிக்கோட்டையில் இருந்து கர்நாடகாவுக்கு கடத்த முயன்ற 3¼ டன் ரேஷன் அரிசி பறிமுதல் 3 பேர் கைது

கிருஷ்ணகிரி:

மத்தூர் மற்றும் தேன்கனிக்கோட்டை பகுதிகளில் இருந்து சரக்கு வேனில் கர்நாடகாவுக்கு கடத்த முயன்ற 3¼ டன் ரேஷன் அரிசியை போலீசார் பறிமுதல் செய்தனர். இதுதொடர்பாக 3 பேர் கைது செய்யப்பட்டனர்.

கிருஷ்ணகிரி மாவட்டத்தில் இருந்து ரேஷன் அரிசி கர்நாடகாவுக்கு கடத்தப்படுவதாக போலீசாருக்கு ரகசிய தகவல் கிடைத்தது. இதையடுத்து மாவட்ட உணவு பொருள் கடத்தல் தடுப்பு பிரிவு போலீஸ் இன்ஸ்பெக்டர் வளர்மதி தலைமையில், சப்-இன்ஸ்பெக்டர்கள் தென்னரசு, கோபிநாத் மற்றும் போலீசார் தீவிர வாகன தணிக்கையில் ஈடுபட்டனர்.

மத்தூர் அருகே உள்ள பெருகோபனப்பள்ளியில் மொபட்டில் மூட்டையுடன் சென்ற நபரை போலீசார் நிறுத்தி சோதனை செய்தனர். அதில் ரேஷன் அரிசி கடத்தியது தெரிந்தது. இதுதொடர்பாக போலீசார் விசாரணை நடத்திய போது அவர் அதேபகுதியை சேர்ந்த விஜி (வயது52) என்பது தெரியவந்தது. இதையடுத்து அவரை போலீசார் கைது செய்தனர். மேலும் அவர் அப்பகுதியில் 22 மூட்டைகளில் பதுக்கி வைத்திருந்த 1,200 கிலோ அரிசியை போலீசார் பறிமுதல் செய்தனர்.

இதேபோல் தேன்கனிக்கோட்டை பெட்ரோல் பங்க் அருகில் போலீசார் வாகன தணிக்கையில் ஈடுபட்டனர். அப்போது அந்த வழியாக வந்த சரக்கு வாகனத்தை நிறுத்தி சோதனை செய்தனர். அதில் 42 மூட்டைகளில் 2,100 கிலோ ரேஷன் அரிசி இருந்தது தெரியவந்தது. இதுகுறித்து வாகனத்தில் வந்தவர்களிடம் போலீசார் விசாரணை நடத்தினர். 

அப்போது  மத்திகிரி அருகே உள்ள சிப்பாய் பள்ளம் பகுதியை சேர்ந்த சபீர்கான் (30), கர்நாடகா மாநிலம் ஆனெக்கல் பகுதியை சேர்ந்த சையத்ஜாவித் (40) என்பதும், குறைந்த விலைக்கு ரேஷன் அரிசியை வாங்கி, கர்நாடகாவுக்கு கடத்த முயன்றதும் தெரியவந்தது. இதையடுத்து அவர்கள் 2 பேரையும் போலீசார் கைது செய்தனர். மேலும் ரேஷன் அரிசி மற்றும் சரக்கு வாகனத்தை பறிமுதல் செய்தனர்.