புதுக்கோட்டை மாவட்டத்தில் உலக மகளிர் தின விழா கொண்டாட்டம்

பொன்னமராவதி அருகே உள்ள கருப்புக்குடிப்பட்டியில் உலக மகளிர் தின விழா கொண்டாடப்பட்டது. விழாவில் ஐஸ்வர்யா தலைமை தாங்கினார். ஆசிரியர் ராதா வரவேற்றார். விழாவில் ஆசிரியர் பிரேமலதா சிறப்புரையாற்றினார். இதில் மகளிர் தின பாடல்கள், மகளிர் தினக்கவிதைகள் மற்றும் பரிசளிப்பும் நடைபெற்றது. இதில் கருப்புக்குடிபட்டியை சேர்ந்த ஆசிரியர்கள், இளம் பெண்கள், பள்ளி, கல்லூரி மாணவிகள் மற்றும் தமிழ்நாடு அறிவியல் இயக்க நிர்வாகி புவியரசு, பொன்னமராவதி ஒன்றிய தமிழ்நாடு அறிவியல் இயக்க செயலாளர் ராசு ஆகியோர் கலந்து கொண்டனர். முடிவில் ஆசிரியர் செல்வி சிவராமு நன்றி கூறினார்.

ஆலங்குடியில் உள்ள சட்ட ஒழுங்கு பராமரிப்பு போலீஸ் நிலையத்தில் உலக மகளிர் தினம் கொண்டாடப்பட்டது. நிகழ்ச்சியில் இன்ஸ்பெக்டர் அழகம்மை உள்பட அனைத்து மகளிர் காவலரும் இணைந்து கேக் வெட்டினர். பின்னர் அனைவருக்கும் கேக் வழங்கப்பட்டது. 

மணமேல்குடி ஒன்றியம் வெள்ளூர் ஊராட்சி ஒன்றிய நடுநிலைப்பள்ளியில் மகளிர் தினத்தையொட்டி குழந்தைகள் பாதுகாப்பு உறுதிமொழி ஏற்பு நிகழ்ச்சி நடைபெற்றது. இதற்கு பள்ளி தலைமையாசிரியர் பாலசுப்பிரமணியம் தலைமையில் மாணவர்கள் உறுதி மொழி எடுத்துக்கொண்டனர். இதில் ஆசிரியர்கள், அரசு மருத்துவர், மாணவர்கள் கலந்து கொண்டனர். 

அரிமளம் ஊராட்சி ஒன்றிய அலுவலகத்தில் ஒன்றிய தலைவர் மேகலா முத்து தலைமையில், ஆணையர் அமுதவல்லி முன்னிலையில் மகளிர் தின விழா கொண்டாடப்பட்டது. விழாவில் கேக் வெட்டி மகளிர் தின வாழ்த்துக்களை அனைத்து ஒன்றிய கவுன்சிலர்கள் மற்றும் அரசு அலுவலர்களுக்கும் தெரிவிக்கப்பட்டது. அதனைத் தொடர்ந்து பெண்களை போற்றும் பாடல்களை பாடி மகிழ்ந்தனர். நிகழ்ச்சியில் துணை வட்டார வளர்ச்சி அலுவலர் சரோஜா மற்றும் அனைத்து ஒன்றிய கவுன்சிலர்கள், ஊராட்சி ஒன்றிய அலுவலர்கள், பணியாளர்கள் கலந்து கொண்டனர்.

அரிமளம் ஒன்றியம் கீழப்பனையூர் கிராமத்தில் உள்ள சமுதாய கூடத்தில் உலக மகளிர் தின விழா கொண்டாடப்பட்டது. விழாவிற்கு ஊராட்சி மன்ற தலைவர் பழனியப்பன் ராமசாமி தலைமை தாங்கினார். தொடர்ந்து விழாவில் கலந்து கொண்டவர்களுக்கு போட்டிகள் வைக்கப்பட்டு பரிசுகள் வழங்கப்பட்டது. இதில் கிராம நிர்வாக அலுவலர் வெங்கடேசன், தலைமையாசிரியர் மல்லிகா மற்றும் 100-க் கும் மேற்பட்ட பெண்கள் கலந்து கொண்டனர். பின்னர் அனைவருக்கும் மரக்கன்றுகள் வழங்கப்பட்டது. விழாவை சேது பாஸ்கரா வேளாண்மை அறிவியல் கல்லூரி மாணவர்கள் சலாவுதீன், இர்பான் குழுவினர் மற்றும் புஷ்கரம் வேளாண் அறிவியல் கல்லூரி சார்ந்த ஜான் மிலன் குழுவினர் இணைந்து நடத்தினர்.