மோட்டார் சைக்கிள் விபத்தில் தொழிலாளி சாவு

மணவாளக்குறிச்சி, 

மணவாளக்குறிச்சி அருகே மோட்டார் சைக்கிள் விபத்தில் தொழிலாளி பரிதாபமாக இறந்தார்.

தக்கலை அருகே உள்ள கேரளபுரத்தை சேர்ந்தவர் ரமேஷ் (வயது 55), தொழிலாளி. இவருடைய உறவினர் குளச்சல் சாஸ்தான்கரையைச் சேர்ந்த சோனு ராஜசேகர் (34). இவர் ராணுவ வீரராக பணியாற்றி வருகிறார். தற்போது விடுமுறையில் ஊருக்கு வந்துள்ளார். சம்பவத்தன்று ரமேசும், சோனு ராஜசேகரும் மோட்டார் சைக்கிளில் பிள்ளையார் கோவிலில் இருந்து திங்கள்நகருக்கு சென்று கொண்டிருந்தனர். மோட்டார் சைக்கிளை சோனு ராஜசேகர் ஓட்டினார். ரமேஷ் பின்னால் அமர்ந்திருந்தார். அவர்கள் குன்னங்காடு பகுதியில் சென்றபோது திடீரென மோட்டார் சைக்கிள் நிலைதடுமாறி சாலையில் கவிழ்ந்தது. இதில் தூக்கி வீசப்பட்ட இருவரில் ரமேசுக்கு தலையில் பலத்த காயமும், சோனு ராஜசேகருக்கு லேசான காயம் ஏற்பட்டது.  உடனே அவர்களை அக்கம் பக்கத்தினர் மீட்டு சிகிச்சைக்காக ஆசாரிபள்ளம் அரசு ஆஸ்பத்திரிக்கு அனுப்பி வைத்தனர். அங்கு தீவிர சிகிச்சை பலனின்றி நேற்று முன்தினம் ரமேஷ் பரிதாபமாக இறந்தார். இதுகுறித்த புகாரின் பேரில் விபத்துக்கு காரணமான சோனு ராஜசேகர் மீது மணவாளக்குறிச்சி போலீசார் வழக்குப்பதிவு செய்து அவரை கைது செய்தனர்.