<
கல்வியை மாநில பட்டியலுக்கு மாற்ற வேண்டும் என்று கோவையில் நடந்த தென்மண்டல துணைவேந்தர்கள் மாநாட்டில் முதல்-அமைச்சர் மு.க.ஸ்டாலின் காணொலி காட்சி மூலம் பேசினார்
கல்வியை மாநில பட்டியலுக்கு மாற்ற வேண்டும் என்று கோவையில் நடந்த தென்மண்டல துணைவேந்தர்கள் மாநாட்டில் முதல்-அமைச்சர் மு.க.ஸ்டாலின் காணொலி காட்சி மூலம் பேசினார்
கோவை
கல்வியை மாநில பட்டியலுக்கு மாற்ற வேண்டும் என்று கோவையில் நடந்த தென்மண்டல துணைவேந்தர்கள் மாநாட்டில் முதல்-அமைச்சர் மு.க.ஸ்டாலின் காணொலி காட்சி மூலம் பேசினார்.
முதல்-அமைச்சர் மு.க.ஸ்டாலின் பேச்சு
கோவை பாரதியார் பல்கலைக்கழகத்தில் இந்திய பல்கலைக் கழகங்களின் கூட்டமைப்பின் சார்பில் தென் மண்டல துணை வேந்தர்கள் பங்கேற்ற 2 நாள் மாநாடு நேற்று தொடங்கியது.
இதை தமிழக கவர்னர் ஆர்.என்.ரவி தலைமை தாங்கி குத்துவிளக்கேற்றி தொடங்கி வைத்தார்.
நிகழ்ச்சியில் தமிழக முதல்-அமைச்சர் மு.க.ஸ்டாலின், காணொலி காட்சி வாயிலாக பங்கேற்று பேசியதாவது
இந்த மாநாடு ஆக்கப்பூர்வமானதாக அமைய வேண்டும் என நான் வாழ்த்துகிறேன். இந்த மாநாட்டின் மைய பொருளாக உயர்கல்வி நிறுவனங்கள் மூலம் ஒருங்கிணைந்த சமமான மற்றும் தரமான கல்வியை நடைமுறைப்படுத்துதலின் அவசியம் என்ற ஐக்கிய நாடுகள் அமைப்பின் அறைகூவல் அமைந்து உள்ளது.
தரமான உயர்கல்வி வழங்குவதில் தமிழகத்தில் உள்ள பல்கலைக் கழகங்கள் மற்ற மாநிலங்களுக்கு முன்னோடியாக திகழ்கிறது.
பாராட்டுகிறேன்
அறிவுப்பூர்வமான, அறிவியல் சார்ந்த உண்மைகளை மட்டுமே ஊக்கு விக்கும் வகையில் தமிழகத்தில் பல்கலைக்கழகங்கள் செயல்பட்டு வரு கின்றன.
ஆகவேதான் தென்னகத்தை சேர்ந்த 6 மாநிலங்களின் பல் கலைக்கழக துணைவேந்தர்கள் இருக்கக்கூடிய அவையில் தமிழகம் உயர்கல்வியில் சிறந்து விளங்குகிறது என்பதை தெரிவிப்பதற்கு பெரு மையாகவே இருக்கிறது.
இந்த பெருமையையும், புகழையும் பெற்றுத் தந்து உள்ள தமிழக அரசின் உயர்கல்வித்துறை மற்றும் பல்கலைக் கழகங்களை பாராட்டுகிறேன்.
2020-21-ம் ஆண்டுக்கான தேசிய நிறுவனங்களுக்கான தரவரிசை கட்டமைப்பில் இந்திய அளவில் தமிழகத்தின் 19 பல்கலைக்கழகங்கள் மற்றும் 33 கல்லூரிகள் முதல் 100 இடங்களுக்குள் உள்ளன.
சென்னை லயோலா கல்லூரி இந்திய அளவில் 3-வது இடம் பெற்று பெருமை சேர்த்து இருக்கிறது.
முன்னணி மாநிலம்
உயர்கல்வி பயில வரும் மாணவர்களின் சேர்க்கை விகிதம் தேசிய அளவில் 27.1 சதவீதம். ஆனால் தமிழகத்தில் உயர்கல்வி மாணவர் சேர்க்கை விகிதம் 51.4 சதவீதம் என்ற அளவுக்கு உயர்ந்து இருக்கிறது.
இது தேசிய சராசரியை விட 2 மடங்கு அதிகம் என்பது உயர்கல்வியில் தமிழகம் நிகழ்த்திய சாதனையாகும். அதுமட்டுமல்ல 17 மாணவர்களுக்கு ஒரு ஆசிரியர் என்ற விகிதத்தில் தமிழகம் முன்னணி மாநிலமாக விளங்குகிறது.
தமிழகத்தில் 1,553 கல்லூரிகள், 52 அரசு மற்றும் தனியார் பல்கலைக் கழகங்கள், 1,096 தொழிற்கல்வி நிறுவனங்கள் உயர்கல்வி அளித்து தமிழக கல்வி வளர்ச்சிக்கு துணை நிற்கின்றன.
தொழிற் கல்வியிலும், மருத்துவ கல்லூரியிலும் மாணவர் சேர்க்கையில் தமிழக அரசு 7.5 சதவீதம் இட ஒதுக்கீடு செய்து சாதாரண நிலையில் உள்ளவர்களும் சிறந்த நிலைக்கு உயர வழிவகுத்து உள்ளது.
நுழைவுத்தேர்வு ஒழிப்பு
தொழிற்கல்வி மற்றும் மருத்துவ படிப்பில் சேர நுழைவுத்தேர்வு கட்டாயம் என்பதை ஒழித்துக்கட்டி கிராமப்புற, பிற்படுத்தப் பட்ட மாணவர்களுக்கு பெரும் அளவில் மேற்படிப்பில் இடம் கிடைக்க செய்தவர் கருணாநிதி தான்.
பெண் அடிமைத்தனத்தை ஒழித்து பெண்கள் சமூக ரீதியாகவும், பொருளாதார ரீதியாவும் விடுதலை பெற்றவர்களாக திகழ வேண்டும் என்பதே திராவிட இயக்க வழி வந்த நமது கொள்கை.
அதை அடைய கல்வியே திறவுகோல். ஆகவே தமிழக அரசு பெண்களுக்கு என்று தனி கல்லூரிகள், இருபாலர் கல்லூரிக்கு அனுமதி, பெண்களுக்கென்று தனி பல்கலைக்கழகம்,
இளநிலை, முதுநிலை மற்றும் முனைவர் படிப்பில் பெண்களுக்கு உதவித்தொகை, அகில இந்திய பணிகளுக்கு தேர்ச்சி பெற பயிற்சி தரும் மையங்கள், வேலைவாய்ப்பிற்காக கணினி பயிற்சி, முனைவர் ஆராய்ச்சி படிப்புக்கான உதவித்தொகை போன்ற மாணவிகளுக்கான சிறப்பு திட்டங்களை அரசு செயல்படுத்தி வருகிறது.
இதன் மூலம் பெண்ணுரிமைக்கு முன்னுரிமை தந்து நாட்டிற்கே முன்னோடி மாநிலமாக தமிழகம் திகழ்கிறது.
நான் முதல்வன் திட்டம்
நான் ஆட்சிப்பொறுப்பேற்றவுடன் பல்வேறு திட்ட அறிவிப்புகளை 2021-22-ம் ஆண்டுக்கான நிதிநிலை அறிக்கையில் வெளியிட்டு இருந்தோம்.
அதில் இதுவரை இல்லாத வகையில் உயர்கல்வி துறைக்கு ரூ.5,369 கோடி நிதி ஒதுக்கி திட்டங்களை நிறைவேற்றி வருகிறோம்.
மாநிலத்தில் உயர்கல்வி சென்றடையாத பகுதிகளுக்கும் அடுத்த 10 ஆண்டுகளில் அரசால் விரிவுப்படுத்தப்பட உள்ளது.
தாய் மொழி கல்வியை மேம்படுத்தும் பொருட்டு தொடக்கத்தில் 4 பொறியியல் கல்லூரிகளில் இளநிலை படிப்பு தமிழில் நடப்பதற்கு அனுமதி அளிக்கப்பட்டு உள்ளது.
அத்துடன் தொழிற்கல்வியில் உள்ள பாடநூல்களை தமிழில் மொழி மாற்றம் செய்ய ரூ.20 கோடி நிதி ஒதுக்கப்பட்டு உள்ளது.
தற்போது பல்கலைக்கழகங்கள் பெரும்பாலும் பட்டதாரிகளை உருவாக்குவதும், முனைவர் பட்டங்களை வழங்குவதிலும், தேசிய மற்றும் உலகளவில் தரவரிசை பெறுவதிலும் பணியாற்றி வருகின்றன.
ஆனாலும் கூட இந்திய உயர்கல்வியின் முக்கியமான குறிக்கோளான அனைவருக்கும் வேலை தரும் கல்வி வழங்குவதில் கூடுதல் கவனம் செலுத்த வேண்டிய மிகப்பெரிய கடமை உங்களுக்கு இருப்பதை நினைவுப்படுத்த விரும்புகிறேன்.
திறன் சார்ந்த கல்வியும், பயிற்சியும் பாடத்திட்டங்களில் கட்டாயப்படுத்துதல் அவசியம். அதனால் தான் மார்ச் 1-ந் தேதி நான் முதல்வன் என்ற திட்டத்தை மாணவச் செல்வங்களுக்காக தொடங்கி வைத்தேன்.
மாநில பட்டியலுக்கு மாற்ற வேண்டும்
பல்கலைக்கழகத்தின் தரத்தையும், செயல்பாட்டையும் வடிவமைப்பதில் முக்கிய பங்காற்றுவோர் துணைவேந்தர்கள்தான். நீங்கள் அனைவரும் அறிவியல் பூர்வமான சிந்தனைகளை மாணவர்களிடம் வளர்த்தெடுக்கும் வகையில் உங்கள் பணியை மேற்கொள்ள வேண்டும்.
மேலும் கல்வி என்பது ஒத்திசைவு பட்டியலில் இருப்பதை வைத்து மத்திய அரசு தனது அதிகாரத்தை பயன்படுத்தி, பிற்போக்கு கருத்துகளை பாடத்திட்டங்களில் புகுத்தும் போக்கும் கவலைக்குரியதாக உள்ளது.
கல்வியை முழுமையாக மாநில பட்டியலுக்கு மாற்றுவதே இதற்கு சிறந்த தீர்வாக அமையும்.
மாநிலத்தில் உள்ள கல்வி கொள்கையின் அடிப்படையில் பல்கலைக் கழகங்கள் செயல்பட வேண்டும் என்பதே இங்கு உள்ள மக்களின் விருப்பம். அதை உணர்ந்து பல்கலைக்கழக துணைவேந்தர்கள் செயல்பட வேண்டும்.
இந்த மாபெரும் மாநாடு தன் நோக்கங்களில் வெற்றி பெறவும், அதன் மூலம் நமது நாட்டின் உயர்கல்வி மேன்மை பெற வேண்டும்.
இவ்வாறு அவர் பேசினார்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
