லாட்டரி சீட்டு விற்ற 2 பேர் கைது

திருபுவனை, மார்ச்.13-

திருபுவனை அருகே கலிதீர்த்தாள்குப்பம்- திருக்கனூர் ரோட்டில் செல்போனில் வாட்ஸ்-அப் மூலம் 3-ம் எண் லாட்டரி சீட்டு விற்பனை செய்யப்படுவதாக போலீசாருக்கு ரகசிய தகவல் கிடைத்தது. அதன்பேரில் சப்-இன்ஸ்பெக்டர் குமாரவேல் மற்றும் போலீசார் சாதாரண உடையில் அங்கு சென்று கண்காணித்தனர்.

அப்போது 2 பேர் செல்போன் மூலம் வாடிக்கையாளர்களுக்கு லாட்டரி சீட்டு முடிவுகளை தெரிவித்துக் கொண்டிருந்தனர். இதை பார்த்த போலீசார் அவர்களை சுற்றிவளைத்து பிடித்தனர். விசாரணையில் அவர்கள் அய்யூர் அகரம் மாரியம்மன் கோவில் தெருவை சேர்ந்த பிரபு (வயது 39), விழுப்புரம் சித்தேரிகரையை சேர்ந்த ராஜா (42) என்பது தெரியவந்தது. அவர்கள் 2 பேரையும் போலீசார் கைது செய்தனர். அவர்களிடம் இருந்து செல்போன் மற்றும் 1950 ரொக்க பணம் பறிமுதல் செய்யப்பட்டன.