நாமக்கல்லில் கிணற்றில் தவறி விழுந்து வாலிபர் பலி-போலீசார் விசாரணை

நாமக்கல்:

நாமக்கல் அண்ணாநகரை சேர்ந்தவர் முருகன். இவருடைய மகன் ஜெகதீஷ் (வயது 20). லாரி பட்டறையில் வேலை பார்த்து வந்தார். இந்தநிலையில் நேற்று முன்தினம் திடீரென ஜெகதீஷ் மாயமாகி விட்டார். இதனால் குடும்பத்தினர் அவரை பல்வேறு இடங்களில் தேடினர். இந்தநிலையில் நேற்று ஜெகதீஷ் அங்குள்ள விவசாய கிணற்றில் பிணமாக மிதந்தார். இதுகுறித்து நாமக்கல் தீயணைப்பு நிலையத்துக்கு தகவல் தெரிவிக்கப்பட்டது. இதையடுத்து அங்கு விரைந்து சென்ற தீயணைப்பு வீரர்கள் ஜெகதீஷ் உடலை மீட்டு போலீசாரிடம் ஒப்படைத்தனர். போலீசார் அவரது உடலை பிரேத பரிசோதனைக்காக நாமக்கல் அரசு மருத்துவக் கல்லூரி மருத்துவமனைக்கு அனுப்பி வைத்தனர். போலீசாரின் முதல்கட்ட விசாரணையில் கால் தவறி கிணற்றில் விழுந்த ஜெகதீஷ் நீச்சல் தெரியாத காரணத்தால் தண்ணீரில் மூழ்கி இறந்து இருக்கலாம் என்பது தெரியவந்தது. இது தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.