விளையாட்டு விடுதிகளில் மாணவ-மாணவிகள் சேர்க்கைக்கான தேர்வு போட்டிகள் தர்மபுரியில் 23-ந்தேதி நடக்கிறது

தர்மபுரி:-

தமிழ்நாடு விளையாட்டு மேம்பாட்டு ஆணையத்தின் கீழ் பள்ளிகளில் படிக்கும் மாணவ-மாணவிகள் விளையாட்டுத்துறையில் சாதனை புரிவதற்கு விளையாட்டு பயிற்சி, தங்குமிட வசதி மற்றும் சத்தான உணவுடன் கூடிய விளையாட்டு விடுதிகள், விளையாட்டு பள்ளிகள் செயல்படுகின்றன. இதன்படி மாணவர்களுக்கான விளையாட்டு விடுதிகள் திருச்சி, திருநெல்வேலி, கிருஷ்ணகிரி, கோவை, கடலூர், அரியலூர், தூத்துக்குடி, சிவகங்கை, தேனி, ராமநாதபுரம், உதகமண்டலம், விழுப்புரம், சென்னை, நெய்வேலி, நாமக்கல் ஆகிய இடங்களில் செயல்பட்டு வருகின்றன. 

இதேபோல் மாணவிகளுக்கான விளையாட்டு விடுதிகள் ஈரோடு, திருவண்ணாமலை, நாமக்கல், திண்டுக்கல், நாகர்கோவில், பெரம்பலூர், தேனி, புதுக்கோட்டை, தர்மபுரி, சென்னை ஆகிய இடங்களில் செயல்பட்டு வருகின்றன. 

இந்த விளையாட்டு விடுதிகளில் பயிற்சி பெற்று சிறந்த வீரர்-வீராங்கனைகளாக விளங்குவதற்கு 7,8,9 மற்றும் பிளஸ்-1 வகுப்பு சேர்க்கைக்கான மாவட்ட அளவிலான தேர்வு போட்டிகள் தர்மபுரி மாவட்ட விளையாட்டு அரங்கில் வருகிற 23-ந்தேதி காலை 8 மணிக்கு நடைபெற உள்ளது.

தடகளம், இறகுப்பந்து, கூடைப்பந்து, குத்துச்சண்டை, கிரிக்கெட், கால்பந்து, வாள் சண்டை, ஜிம்னாஸ்டிக், ஆக்கி, நீச்சல், டேக்வாண்டோ, கைப்பந்து, பளுதூக்குதல், கபடி, மேஜைபந்து, டென்னிஸ், ஜூடோ, ஸ்குவாஷ், வில்வித்தை ஆகிய விளையாட்டுகளில் மாணவர்களுக்கு தேர்வு போட்டிகள் நடக்கிறது. தடகளம், இறகுப்பந்து, கூடைப்பந்து, குத்துச்சண்டை, கால்பந்து, வாள்சண்டை, கைப்பந்து, பளு தூக்குதல், கபடி, டென்னிஸ், ஜூடோ, ஸ்குவாஷ் ஆகிய விளையாட்டுகளில் மாணவிகளுக்கு தேர்வு போட்டிகள் நடக்கிறது. இந்த தேர்வு போட்டிகளில் கலந்துகொள்ள www.sdat.gov.in என்ற இணையதள முகவரியில் மட்டுமே விண்ணப்பிக்க முடியும்.

இணையதளத்தில் விண்ணப்பிக்க வருகிற 22-ந்தேதி (செவ்வாய்க்கிழமை) கடைசி நாள் ஆகும். மாவட்ட அளவிலான தேர்வு போட்டிகளில் தேர்ச்சி பெறும் வீரர்-வீராங்கனைகள் மாநில அளவிலான தேர்வு போட்டியில் கலந்து கொள்ள அனுமதிக்கப்படுவார்கள். மாநில அளவிலான போட்டிகளில் சிறப்பாக செயல்படும் வீரர்-வீராங்கனைகள் தமிழ்நாடு விளையாட்டு மேம்பாட்டு ஆணையத்தில் நடத்தப்படும் விளையாட்டு விடுதிகளில் சேர்த்து கொள்ளப்படுவார்கள். 

தர்மபுரி மாவட்டத்தை சேர்ந்த பள்ளி மாணவ-மாணவிகள் இந்த வாய்ப்பை பயன்படுத்தி தேர்வு போட்டிகளில் பங்கேற்று விளையாட்டு விடுதிகளில் சேர்ந்து தங்கள் விளையாட்டு திறனை மேம்படுத்தி கொள்ளுமாறு கேட்டுக்கொள்ளப்படுகிறார்கள்.

இவ்வாறு அதில் கூறப்பட்டுள்ளது.