கஞ்சா விற்ற வாலிபர் கைது

தினத்தந்தி 24 March 2022 12:25 AM IST (Updated: 24 March 2022 12:25 AM IST)

அரக்கோணம் அருகே கஞ்சா விற்ற வாலிபரை போலீசார் கைது செய்தனர்.

அரக்கோணம்

ராணிப்பேட்டை மாவட்டம் அரக்கோணத்தை அடுத்த சாலை கிராமம் மற்றும் எஸ்.ஆர். கண்டிகை பகுதிகளில் அரக்கோணம் தாலுகா போலீஸ் சப்-இன்ஸ்பெக்டர் கோவிந்தசாமி தலைமையிலான போலீசார் நேற்று முன்தினம் இரவு ரோந்து பணியில் ஈடுபட்டு இருந்தனர்.

அப்போது எஸ்.ஆர். கண்டிகை பஸ் நிறுத்தத்தில் நள்ளிரவு நேரத்தில் சந்தேகிக்கும் வகையில் நின்றிருந்த நபரை பிடித்து விசாரித்தனர். அதில் அந்த நபர் காஞ்சீபுரம் மாவட்டம் கோவிந்தவாடி கிராமத்தை சேர்ந்த புருஷோத்தமன் (வயது 32) என்பதும். ஏற்கனவே கஞ்சா வழக்கில் கைதானவன் என்பதும் தெரியவந்தது.

தொடர்ந்து அவரிடம் விசாரணை நடத்திய போது அப்பகுதியில் கஞ்சா விற்பதற்காக வந்தது தெரிய வந்தது. இதனையடுத்து அவரிடமிருந்து ஒரு கிலோ கஞ்சாவை போலீசார் பறிமுதல் செய்தனர்.

மேலும், இது குறித்து அரக்கோணம் தாலுகா போலீஸ் சப்-இன்ஸ்பெக்டர் கோவிந்தசாமி வழக்குப்பதிவு செய்து புருஷோத்தமனை கைது செய்தார்.