டிராக்டர் மோதி கல்லூரி மாணவர் பலி

அரியலூர் மாவட்டம், விக்கிரமங்கலம் அருகே உள்ள தா.பழூர் குட்டக்கரை பகுதியைச் சேர்ந்தவர் ஜோதி. இவரது மகன் பிரவீன்ராஜ்(வயது 19). இவர் வி.கைகாட்டி அருகே உள்ள ஒரு தனியார் என்ஜினீயரிங் கல்லூரியில் முதலாம் ஆண்டு படித்து வந்தார். வழக்கம்போல நேற்று தனது ஸ்கூட்டரில் கல்லூரிக்கு ஸ்ரீபுரந்தான் வழியாக சென்று கொண்டிருந்தார். ஸ்ரீபுரந்தான் ஊராட்சி மன்ற அலுவலகம் அருகே அவா் சென்றபோது எதிரே வந்த டிராக்டர் எதிர்பாராதவிதமாக ஸ்கூட்டர் மீது மோதியது.

 இதில், கீழே விழுந்த அவர் மீது டிராக்டரின் பின் சக்கரம் ஏறி இறங்கியதில் சம்பவ இடத்திலேயே பிரவீன்ராஜ் பலியானார். இதனைக் கண்டதும் டிராக்டர் டிரைவர் டிராக்டரை அங்கேயே விட்டு, விட்டு தப்பி ஓடி விட்டார்.

இதுகுறித்து தகவல் அறிந்த விக்கிரமங்கலம் போலீசார் சம்பவ இடத்திற்கு விரைந்து சென்று பிரவீன்ராஜ் உடலை மீட்டு பிரேத பரிசோதனைக்காக ஜெயங்கொண்டம் அரசு மருத்துவமனைக்கு அனுப்பி வைத்தனர். பின்பு டிராக்டரை போலீஸ் நிலையத்திற்கு ஓட்டிச் சென்றனர்.

இந்த விபத்து தொடர்பாக போலீசார் வழக்குப்பதிவு செய்து தப்பி ஓடிய டிரைவரை வலைவீசி தேடி வருகின்றனர். கல்லூரிக்கு சென்ற மாணவர் டிராக்டர் மோதி உயிரிழந்த சம்பவம் உறவினர்கள் மற்றும் சக மாணவர்களிடையே பெரும் சோகத்தை ஏற்படுத்தியது.