பிணைப்பத்திரத்தை மீறி குற்றச்செயலில் ஈடுபட்ட வாலிபருக்கு மேலும் 6 மாதம் ஜெயில் தண்டனை

திருச்செந்தூர் உதவி கலெக்டரிடம் எழுதி கொடுத்த பிணைப்பத்திரத்தை மீறி குற்றச்செயலில் ஈடுபட்ட வாலிபருக்கு மேலும் 6 மாதம் ஜெயில் தண்டனை விதிக்கப்பட்டு உள்ளது.

மெஞ்ஞானபுரம் அருகேயுள்ள கல்விளைகோயில் தெருவைச் சேர்ந்த முருகன் மகன் இரட்டைமுத்து (வயது 38). கடந்த டிசம்பர் 9-ந் தேதி குற்ற விசாரணை நடைமுறைச் சட்டப் பிரிவு 110-ன் படி திருச்செந்தூர் உதவிகலெக்டர் நீதிமன்றத்தில் நேரில் ஆஜர்படுத்தி, இரட்டைமுத்துவிடம் பொது அமைதிக்கு பங்கம் விளைவிக்கும் வகையில் 6 மாத காலத்திற்கு குற்ற செயல்களில் ஈடுபட மாட்டேன் என உறுதிமொழி கொடுத்து ரூ.10ஆயிரத்துக்கான பிணை பத்திரம் எழுதி கொடுத்துள்ளார். 

இந்த நிலையில், கடந்த 12-ந்தேதி மெஞ்ஞானபுரம் அருகேயுள்ள கல்விளை வழுக்கைகுளம் பகுதியில் நகனையைச் சேர்ந்த சுடலை மனைவி மூக்கம்மாள் (55) என்பவரை முன்விரோதம் காரணமாக கம்பால் தாக்கி கொலை மிரட்டல் விடுத்த வழக்கில் போலீசார் இரட்டைமுத்துவை கைது செய்து சிறையில் அடைத்தனர்.

இதனையடுத்து பிணைப்பத்திரத்தை மீறி 6 மாத காலம் முடிவதற்குள் இரட்டைமுத்து குற்ற செயலில் ஈடுபட் டுள்ளதால், அவர் மீது நடவடிக்கை எடுக்க சாத்தான்குளம் போலீஸ் துணை சூப்பிரண்டு ராஜூவுக்கு போலீஸ் சூப்பிரண்டு உத்தரவிட்டார். 

இதனையடுத்து மெஞ்ஞானபுரம் இன்ஸ்பெக்டர் (பொறுப்பு) பட்டாணி இரட்டைமுத்து மீது குற்ற விசாரணை நடைமுறைச் சட்டப்பிரிவு 110-ன் படி நடவடிக்கை எடுக்க திருச்செந்தூர் உதவிகலெக்டர் நீதிமன்றத்தில் அறிக்கை தாக்கல் செய்தார். இதனையடுத்து ஏற்கனவே கோவில்பட்டி கிளை சிறையில் அடைக்கப்பட்டுள்ள இரட்டைமுத்துவை வரும் டிசம்பர் 8-ந்தேதி வரை சிறையில் அடைக்க திருச்செந்தூர் உதவி கலெக்டர் உத்தரவு நகல் மெஞ்ஞானபுரம் போலீசாரால் நேற்று முன்தினம் வழங்கப்பட்டது.