டி என் பி எஸ் சி மூலம் நடத்தப்படும் போட்டி தேர்வுக்கான இலவச பயிற்சி வகுப்பில் சேர பதிவு செய்ய வேண்டும் கள்ளக்குறிச்சி கலெக்டர் தகவல்

கள்ளக்குறிச்சி

கள்ளக்குறிச்சி மாவட்ட கலெக்டர் ஸ்ரீதர் வெளியிட்டுள்ள செய்திக்குறிப்பில் கூறியிருப்பதாவது:-

போட்டி தேர்வு

கள்ளக்குறிச்சி மாவட்டத்தில் தமிழ்நாடு அரசு பணியாளர் தேர்வாணையத்தால் வெளியிடப்பட்ட 2022-ம் ஆண்டுக்கான ஆண்டு திட்ட நிரலின் படி டி.என்.பி.எஸ்.சி குரூப்-2, 2-ஏ மற்றும் 4 தேர்வுக்கான அறிவிப்பு வெளியிடப்பட்டுள்ளது. தேர்வு எழுத விரும்புவோர் www.tnpsc.gov.in என்ற தமிழ்நாடு அரசு பணியாளர் தேர்வாணைய இணையதளம் வாயிலாக விண்ணப்பித்திட தெரிவிக்கப்பட்டுள்ளது. 

இதைத் தொடர்ந்து மேற்கண்ட போட்டி தேர்வுக்கு தயாராகும் கள்ளக்குறிச்சி மாவட்டத்தை சேர்ந்த தேர்வர்கள் பயனடையும் வகையில் கள்ளக்குறிச்சி மாவட்ட வேலைவாய்ப்பு மற்றும் தொழில்நெறி வழிகாட்டும் மையம் சார்பில் வருகிற 29-ந் தேதி(செவ்வாய்க்கிழமை) முதல் வாரநாட்களில் திங்கள் முதல் வெள்ளி வரை நேரடி பயிற்சி வகுப்புகள் காலை 10 மணி முதல் மதியம் 1 மணி வரை நடைபெற உள்ளது.

பதிவு செய்ய வேண்டும்

இப்பயிற்சி வகுப்பில் சேர விருப்பம் உள்ளவர்கள் தங்களது குரூப்-2, 2-ஏ தேர்வுக்கு விண்ணப்பித்த விண்ணப்பநகல், புகைப்படம் மற்றும் ஆதார் எண் ஆகிய விவரங்களுடன் எண்18/63, நேப்பால் தெருவில் அமைந்துள்ள மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தை நேரில் தொடர்பு கொண்டோ அல்லது 6381090764 என்ற வாட்ஸ்-ஆப் எண்ணில் தங்களின் விவரத்தை தெரிவித்தோ பதிவு செய்து கொள்ளலாம்.

இப்பயிற்சி வகுப்புகளில் அரசு பணிக்கு தயாராகிவரும் கள்ளக்குறிச்சி மாவட்ட வேலைதேடும் இளைஞர்கள் மற்றும் இளம்பெண்கள் கலந்து கொண்டு பயன்பெறலாம்.இவ்வாறு அந்த செய்திக்குறிப்பில் கூறப்பட்டுள்ளது.