கிருஷ்ணகிரியில் உலக காசநோய் விழிப்புணர்வு ஊர்வலம் வருவாய் அலுவலர் தொடங்கி வைத்தார்

கிருஷ்ணகிரி:

கிருஷ்ணகிரி புதிய பஸ் நிலையம் அருகில் உலக காசநோய் தினத்தையொட்டி விழிப்புணர்வு ஊர்வலம் நடந்தது. இந்த நிகழ்ச்சிக்கு மாவட்ட வருவாய் அலுவலர் ராஜேஸ்வரி தலைமை தாங்கி கொடியசைத்து ஊர்வலத்தை தொடங்கி வைத்தார். இந்த ஊர்வலம் நகரின் முக்கிய சாலைகள் வழியாக சென்று நிறைவடைந்தது. பின்னர் கலெக்டர் அலுவலக கூட்ட அரங்கில் நடந்த நிகழ்ச்சியில், மாவட்ட வருவாய் அலுவலர் தலைமையில் தன்னார்வலர்கள், சுகாதார துறை அலுவலர்கள் காசநோய் தடுப்பு விழிப்புணர்வு குறித்து உறுதிமொழி எடுத்து கொண்டனர். தொடர்ந்து 25 பயனாளிகளுக்கு ஊட்டச்சத்து பொருட்களை வழங்கினார். இந்த நிகழ்ச்சியில், காசநோய் துணை இயக்குனர் டாக்டர். சுகன்தா, மாவட்ட ஒருங்கிணைப்பாளர் துரைமுருகன் உள்ளிட்ட பலர் கலந்து கொண்டனர்.