திருநங்கைகளுடனான ஆலோசனை கூட்டம்

அரியலூர்:

சர்வதேச திருநங்கைகள் தினத்தை முன்னிட்டு திருநங்கைகளுடனான ஆலோசனை கூட்டம் கலெக்டர் அலுவலகத்தில் நேற்று நடந்தது. கூட்டத்திற்கு கலெக்டர் ரமணசரஸ்வதி தலைமை தாங்கி, திருநங்கைகளின் வாழ்வாதார நிலை குறித்தும், அவர்களது இருப்பிட வசதிகள், சிறு தொழில் செய்வதற்கான வாய்ப்புகள் குறித்தும் கலந்துரையாடினார். மேலும் சமூக நலத்துறை சார்பாக 2 திருநங்கைகளுக்கு நலத்திட்ட உதவிகள் வழங்கப்பட்டது. கூட்டத்தில் திருநங்கைகளுக்கு சிறப்பு சுய உதவிக்குழுக்கள் அமைப்பது பற்றியும், குழுக்களின் மூலம் அவர்கள் வங்கிக்கடன் பெற்று தங்களது வாழ்வாதாரத்தை மேம்படுத்திக்கொள்வது பற்றியும் விளக்கப்பட்டது. திருநங்கைகளுக்கான சிறப்பு ஓய்வூதிய திட்டம் பற்றி எடுத்துக் கூறப்பட்டது. சமூக நலத்துறையின் மூலம் திருநங்கைகளுக்கு வழங்கப்படும் சுய தொழில் தொடங்குவதற்கான மானியம் பற்றி விளக்கப்பட்டது. திருநங்கைகள் சார்பில் முன்வைக்கப்பட்ட பல்வேறு கோரிக்கைகளை நிறைவேற்ற நடவடிக்கை எடுக்கப்படும் என்று கலெக்டர் தெரிவித்தார்.