முதல்வரின் முகவரி துறை மூலம் 33,122 மனுக்கள் மீது நடவடிக்கை

விழுப்புரம், 

விழுப்புரம் மாவட்ட நிர்வாகத்தின் மூலம் முதல்வரின் முகவரி துறையின் கீழ் பெறப்பட்ட மனுக்கள் மீது மேற்கொள்ளப்பட்டு வரும் நடவடிக்கைகள் குறித்த ஆய்வுக்கூட்டம் நேற்று கலெக்டர் அலுவலகத்தில் நடைபெற்றது. கூட்டத்திற்கு மாவட்ட கலெக்டர் மோகன் தலைமை தாங்கினார். தனி அலுவலர் ராமபிரதீபன் முன்னிலை வகித்தார். கூட்டத்தில் கலெக்டர் மோகன் பேசியதாவது:-

இதுவரை விழுப்புரம் மாவட்டத்திற்கு 81,913 மனுக்கள் வரப்பெற்றுள்ளதில் உடனடி நடவடிக்கையாக 33,122 மனுக்கள் மீது நடவடிக்கை எடுத்து மனுதாரருக்கு தீர்வு வழங்கப்பட்டுள்ளது. 37,122 மனுக்கள் உரிய ஆவணங்களுடன் மனுதாரர்கள் விண்ணப்பிக்காததால் அவர்களிடம் உரிய ஆவணங்களுடன் விண்ணப்பிக்க அறிவுறுத்தப்பட்டுள்ளது. 

மீதமுள்ள மனுக்கள் நடவடிக்கையில் உள்ளது. மாவட்ட அளவில் உள்ள அலுவலர்கள் தங்கள் துறைக்கு வரும் கோரிக்கை மனுக்கள் மீது காலதாமதமின்றி நடவடிக்கை மேற்கொள்ள வேண்டும்,  இவ்வாறு அவர் பேசினார். கூட்டத்தில் மாவட்ட வருவாய் அலுவலர் ராஜசேகரன், முதல்வரின் முகவரித்துறை தனித்துணை ஆட்சியர் லட்சுமிப்பிரியா, மகளிர் திட்ட இயக்குனர் காஞ்சனா, கலெக்டரின் நேர்முக உதவியாளர் (பொது) மோகன் உள்பட பலர் கலந்து கொண்டனர்.