கிணற்றுக்குள் விழுந்த மயில் உயிருடன் மீட்பு

பெரம்பலூர்:

பெரம்பலூர் அருகே நொச்சியம் கிராமத்தில் சந்திரன் என்பவருக்கு சொந்தமான கிணற்றுக்குள் நேற்று காலை 10 மணியளவில் ஆண் மயில் ஒன்று தவறி விழுந்து தண்ணீரில் தத்தளித்தவாறு உயிருக்கு போராடியது. இதனை கண்டவர்கள் இதுகுறித்து உடனடியாக பெரம்பலூர் தீயணைப்பு நிலையத்துக்கு தகவல் தெரிவித்தனர். அதன்பேரில் நிலைய அலுவலர் உதயகுமார் தலைமையிலான வீரர்கள் சம்பவ இடத்துக்கு விரைந்து சென்றனர். அவர்கள் கிணற்றுக்குள் இறங்கி சுமார் 1 மணி நேரம் போராடி மயிலை உயிருடன் மீட்டு வெளியே கொண்டு வந்தனர். பின்னர் தீயணைப்பு வீரர்கள், அந்த மயிலை வனத்துறையினரிடம் ஒப்படைத்தனர். வனத்துறையினர் அந்த மயிலை வனப்பகுதியில் கொண்டு விட்டனர்.