சிறப்பு தொழில்நெறி வழிகாட்டு பயிற்சி

தொழில் நெறி வழிகாட்டு பயிற்சி

காஞ்சீபுரம் மாவட்ட வேலைவாய்ப்பு மற்றும் பயிற்சித்துறை மற்றும் மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலகம் இணைந்து பிற்படுத்தப்பட்டோர், மிகவும் பிற்படுத்தப்பட்டோர் விடுதியில் தங்கி பயிலும் மாணவ- மாணவி்களுக்கான தொழில் நெறி வழிகாட்டு பயிற்சி காஞ்சீபுரம் மாவட்ட கலெக்டர் அலுவலக வளாகத்தில் உள்ள மக்கள் நல்லுறவு மையத்தில் மாவட்ட கலெக்டர் ஆர்த்தி தலைமையில் நடைபெற்றது.

இதில் மாவட்ட கலெக்டர் டாக்டர் ஆர்த்தி மாணவ- மாணவிகள் இளம் வயதிலேயே போட்டிதேர்வுகளை எதிர்கொண்டு வேலைவாய்ப்புகளை உருவாக்கி கொள்ளவும், சிறப்பு தொழில்நெறி வழிகாட்டுதல்கள் குறித்தும் விளக்கம் அளித்தார்.

மேலும் மாணவர்களுக்கு உயர்கல்வி குறித்தும், வேலைவாய்ப்பு குறித்தும் விரிவாக எடுத்துரைக்கப்பட்டது. மென்திறன் பயிற்சியாளர் புவனேஸ்வரி மாணவர்களுக்கு தனித்திறன் வளர்த்துக்கொள்வது எப்படி என்றும் மாணவர்கள் பிளஸ்-2 முடித்து அடுத்து என்ன படிக்கலாம் என்பது குறித்தும், போட்டி தேர்வுகள் எப்படி எதிர்கொள்வது என்பது குறித்தும் விரிவாக எடுத்துரைக்கப்பட்டது.

சான்றிதழ்கள்

பல்வேறு போட்டிகளில் வெற்றி பெற்ற மாணவ-மாணவி்களுக்கு சான்றிதழ்கள் மற்றும் கேடயங்களை வழங்கப்பட்டது.

இதில், மாவட்ட பிற்படுத்தப்பட்டோர் மற்றும் சிறுபான்மையினர் நல அலுவலர் ரவிச்சந்திரன், மாவட்ட வேலைவாய்ப்பு மற்றும் பயிற்சித்துறை துணை இயக்குனர் அருணகிரி, மாவட்ட தொழில் வணிகத்துறை மாவட்ட தொழில் மையம் துணை இயக்குனர் வெங்கடேசன், மென்திறன் பயிற்சியாளர் புவனேஸ்வரி மற்றும் இளநிலை வேலைவாய்ப்பு அலுவலர் தணிகைவேல் ஆகியோர் கலந்து கொண்டனர்.