சிறுமியை கடத்திய வாலிபர் போக்சோவில் கைது

ஜெயங்கொண்டம்:

கடலூர் மாவட்டம் உளுந்தூர்பேட்டை அருகே உள்ள மணலூர் கிராமத்தைச் சேர்ந்தவர் தமிழ்ச்செல்வன்(வயது 29). இவர் அரியலூர் மாவட்டம் ஜெயங்கொண்டம் சன்னதி தெருவில் உள்ள தனியார் ஜவுளிக்கடையில் தங்கி, அங்கு கடந்த 7 மாதங்களுக்கு மேலாக வேலை பார்த்து வந்தார். இந்நிலையில் இவர், 15 வயது சிறுமியை திருமணம் செய்து கொள்வதாக ஆசை வார்த்தை கூறி பண்ருட்டிக்கு அழைத்து சென்றுள்ளார். பஸ் நிலையத்தில் நீண்ட நேரமாக அவர்கள் நின்றதை பார்த்த சிலர் சந்தேகமடைந்து, அருகில் உள்ள அனைத்து மகளிர் போலீஸ் நிலையத்தில் தகவல் தெரிவித்துள்ளனர். அதன்பேரில் அங்கு வந்த போலீசார், அவர்களிடம் நடத்திய விசாரணையில் ஜெயங்கொண்டத்தில் இருந்து வந்ததாக தெரிவித்துள்ளனர். இதுகுறித்து தகவல் அறிந்த ஜெயங்கொண்டம் போலீசார் பண்ருட்டி சென்று சிறுமியையும், தமிழ்ச்செல்வனையும் ஜெயங்கொண்டம் அனைத்து மகளிர் போலீஸ் நிலையத்திற்கு அழைத்து வந்து விசாரணை நடத்தினர். மேலும் சிறுமியிடம் ஆசை வார்த்தை கூறி கடத்திச் சென்றதாக தமிழ்ச்செல்வன் மீது போக்சோ சட்டத்தின் கீழ் வழக்குப்பதிந்து, அவரை கைது செய்து விசாரித்து வருகின்றனர்.