விபத்தில் தச்சு தொழிலாளி பலி

எருமப்பட்டி:

எருமப்பட்டி அருகே உள்ள மேட்டுப்பட்டி அகதிகள் முகாமை சேர்ந்தவர் சிவசாமி மகன் இந்திரன் (வயது 33). தச்சு தொழிலாளி. இவருடைய மகளுக்கு உடல்நிலை சரியில்லாததால் நாமக்கல் அரசு மருத்துவமனையில் சிகிச்சை பெற்று வருகிறார். இதனால் நாமக்கல் சென்று மகளை பார்த்து விட்டு மீண்டும் மேட்டுப்பட்டி அகதிகள் முகாமுக்கு தனது மோட்டார்சைக்கிளில் திரும்பி வந்து கொண்டிருந்தார். அப்போது மேட்டுப்பட்டி அருகே தொட்டியத்தில் இருந்து நாமக்கல் நோக்கி சென்ற பால் லாரி மோட்டார்சைக்கிள் மீது பயங்கரமாக மோதியது. இதில் தூக்கி வீசப்பட்டு பலத்த காயம் அடைந்த இந்திரன் சம்பவ இடத்திலேயே உயிரிழந்தார். இதுகுறித்து எருமப்பட்டி போலீசார் வழக்குப்பதிவு செய்து விசாரணை நடத்தி வருகின்றனர்.