லாரி டிரைவர் மர்ம சாவு

ஆலங்குடி தாலுகா கும்மங்குளம் கிராமத்தை சேர்ந்தவர் குழந்தைசாமி (வயது 30). டிரைவர். இவர் மன்னார்குடியில் இருந்து கட்டுமான பொருட்களை லாரியில் ஏற்றிக்கொண்டு கந்தர்வகோட்டை அடுத்த கல்லாக்கோட்டைக்கு வந்து கொண்டிருந்தார். கல்லாக்கோட்டை பஸ் நிலையம் அருகில் லாரியை நிறுத்திவிட்டு படுத்து தூங்கினார். இந்தநிலையில் அவருடன் வந்த மற்ற லாரி டிரைவர்கள், குழந்தைசாமியை எழுப்பி லாரியை எடுக்க கூறினர். ஆனால் குழந்தைசாமி படுத்த இடத்திலேயே மர்மமான முறையில் இறந்து கிடந்தார். இதுகுறித்து தகவலின் பேரில் கந்தர்வகோட்டை போலீசார் சம்பவ இடத்திற்கு விரைந்து வந்து குழந்தைசாமியின் உடலை கைப்பற்றி பிரேத பரிசோதனைக்காக புதுக்கோட்டை அரசு மருத்துவக் கல்லூரி மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.