மின்சாரம் தாக்கி பள்ளி மாணவர் சாவு

திட்டச்சேரி:-

நாகை அருகே மின்சாரம் தாக்கி பள்ளி மாணவர் பரிதாபமாக இறந்தார். 

நாகை மாவட்டம் திருமருகல் அருகே உள்ள பண்டாரவடை ஊராட்சி மதகடித்தெருவை சேர்ந்தவர் கஜேந்திரன். இவருடைய மனைவி சங்கீதா. இவர்களுடைய மகன் ரகுராமன் (வயது15). இவர் அடியக்கமங்கலத்தில் உள்ள அரசு மேல்நிலைப்பள்ளியில் 9-ம் வகுப்பு படித்து வந்தார். நேற்று முன்தினம் இரவு 9.30 மணி அளவில் அந்த பகுதியில் காற்றுடன் கூடிய கனமழை பெய்தது.

அப்போது ரகுராமன் இயற்கை உபாதை கழிக்க வீட்டில் இருந்து வெளியே சென்றார். ஆனால் அவர் வெகு நேரமாகியும் திரும்ப வரவில்லை. இதனால் கஜேந்திரன், சங்கீதா ஆகியோர் ரகுராமனை தேடிச்சென்றபோது ரகுராமன் மயங்கிய நிலையில் கிடந்தார். 

அறுந்து கிடந்த மின் வயரை மிதித்ததால் அவரை மின்சாரம் தாக்கியது தெரியவந்தது. இதனால் பதறிப்போன அவருடைய பெற்றோர் அவரை மீட்டு திருமருகல் அரசு ஆரம்ப சுகாதார நிலையத்துக்கு கொண்டு சென்றனர். அங்கு அவரை பரிேசாதித்த டாக்டர்கள் அவர் ஏற்கனவே இறந்துவிட்டதாக தெரிவித்தனர்.  

இதுகுறித்து தகவல் அறிந்த திட்டச்சேரி போலீசார் அங்கு சென்று ரகுராமனின் உடலை மீட்டு நாகை அரசு மருத்துவக்கல்லூரி ஆஸ்பத்திரிக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து போலீசார் வழக்குப்பதிவு செய்து விசாரணை நடத்தி வருகிறார்கள். மின்சாரம் தாக்கி பள்ளி மாணவர் பலியானது அந்த பகுதியை சேர்ந்த மக்களிடையே சோகத்தை ஏற்படுத்தி உள்ளது.