சேலத்தில் இருந்து திருச்செங்கோட்டுக்கு ஆட்டோவில் கடத்திய ரூ.1½ லட்சம் குட்கா பறிமுதல்-டிரைவர் உள்பட 2 பேர் கைது

எலச்சிபாளையம்:

சேலத்தில் இருந்து திருச்செங்கோட்டுக்கு தமிழக அரசால் தடை செய்யப்பட்ட குட்கா உள்ளிட்ட புகையிலை பொருட்கள் கடத்தி வரப்படுவதாக நகர போலீசாருக்கு ரகசிய தகவல் கிடைத்தது. அதன்பேரில் போலீசார் திருச்செங்கோடு புதிய பஸ் நிலையம் காமராஜர் சிலை அருகில் வாகன சோதனையில் ஈடுபட்டனர். அப்போது அந்த வழியாக வந்த பயணிகள் ஆட்டோவை நிறுத்தி சோதனை செய்தனர். அதில் குட்கா கடத்தி வரப்பட்டது கண்டுபிடிக்கப்பட்டது. இதையடுத்து ஆட்டோவில் இருந்த டிரைவர் உள்பட 2 பேரிடம் விசாரித்தனர். அதில் அவர்கள் சேலத்தை சேர்ந்த டிரைவர் கிருபானந்தன் (வயது 62), ராஜஸ்தான் மாநிலத்தை சேர்ந்த சன்வாலாராம் (27) என்பதும், சேலத்தில் இருந்து திருச்செங்கோட்டுக்கு குட்காவை கடத்தி வந்ததும் தெரியவந்தது. இதையடுத்து போலீசார் ரூ.1½ லட்சம் மதிப்பிலான குட்காவை பறிமுதல் செய்தனர். மேலும் கிருபானந்தன், சன்வாலாராமை கைது செய்தனர்.