விபத்தில் வாலிபர் சாவு

நெல்லை:

விருதுநகர் மாவட்டம் முத்தாராம்பட்டி பகுதியை சேர்ந்தவர் யோகராஜ் (வயது 26). இவர் அந்த பகுதியில் உள்ள ஒரு தனியார் நிறுவனத்தில் ஊழியராக வேலை பார்த்து வந்தார்.

சம்பவத்தன்று நாகர்கோவிலில் நடந்த ஒரு திருமண விழாவில் கலந்து கொள்வதற்காக மோட்டார் சைக்கிளில் சென்றார். பின்னர் அங்கிருந்து அதே மோட்டார் சைக்கிளில் ஊருக்கு சென்று கொண்டிருந்தார். 

பாளையங்கோட்டை ரகுமத்நகர் பாலம் பகுதியில் சென்றபோது அந்த பகுதியில் பழுதாகி நின்ற லாரி மீது எதிர்பாராதவிதமாக மோட்டார் சைக்கிள் மோதியது. இதில் தூக்கி வீசப்பட்டு பலத்த காயமடைந்த யோகராஜை அருகில் இருந்தவர்கள் மீட்டு சிகிச்சைக்காக பாளையங்கோட்டை ஐகிரவுண்டு அரசு ஆஸ்பத்திரிக்கு அனுப்பி வைத்தனர். ஆனால் அங்கு சிகிச்சை பலனின்றி யோகராஜ் நேற்று முன்தினம் பரிதாபமாக உயிர் இழந்தார். 

இதுகுறித்து நெல்லை மாநகர போக்குவரத்து புலனாய்வு பிரிவு போலீஸ் சப்-இன்ஸ்பெக்டர் நாராயணன் வழக்குப்பதிவு செய்து விசாரணை நடத்தி வருகிறார்.