விழுப்புரம் கள்ளக்குறிச்சி மாவட்டங்களில் 10 11 12 ம் வகுப்பு மாணவர்களுக்கான செய்முறை தேர்வு தொடங்கியது

விழுப்புரம்

செய்முறை தேர்வு

விழுப்புரம் மாவட்டத்தில் அடுத்த மாதம் (மே) 10, 11, 12-ம் வகுப்பு மாணவ- மாணவிகளுக்கான பொதுத்தேர்வு நடைபெற உள்ளது. இந்த பொதுத்தேர்வின் ஒரு பகுதியான செய்முறை தேர்வு இயற்பியல், வேதியியல், தாவரவியல், உயிரியியல், கணினி அறிவியல், புவியியல், கணக்கு பதிவியலும் தணிக்கையியலும் உள்ளிட்ட பாடப்பிரிவுகளுக்கு நேற்று முதல் தொடங்கியது.

இதற்காக மாவட்டம் முழுவதும் 150 செய்முறை தேர்வு மையங்கள் அமைக்கப்பட்டன. இதில் 10-ம் வகுப்பு செய்முறை தேர்வுகளில் 25,577 மாணவ- மாணவிகள் ஆர்வமுடன் ஈடுபட்டனர். அதேபோல் 11-ம் வகுப்பு செய்முறை தேர்வை 23,582 மாணவ- மாணவிகளும், 12-ம் வகுப்பு செய்முறை தேர்வை 21,675 மாணவ- மாணவிகளும் எழுதினர்.

அதிகாரிகள் பார்வையிட்டனர்

இந்த தேர்வு பணியில் முதுகலை, தொழிற்கல்வி மற்றும் கணினி பயிற்றுனர், ஆசிரியர்கள் என 850 பேரும் மற்றும் 270 புறத்தேர்வர்கள் ஈடுபடுத்தப்பட்டு தேர்வை கண்காணிக்கும் பணியை மேற்கொண்டனர்.

விழுப்புரம், திண்டிவனம், செஞ்சி ஆகிய கல்வி மாவட்ட அலுவலர்கள், அந்தந்த பகுதிகளில் உள்ள தேர்வு மையங்களை நேரில் கண்காணித்தனர். மாவட்ட முதன்மை கல்வி அதிகாரி கிருஷ்ணப்பிரியா, மரக்காணம் அரசு மேல்நிலைப்பள்ளியில் நடைபெற்ற செய்முறை தேர்வை நேரில் பார்வையிட்டு ஆய்வு மேற்கொண்டார்.

 அப்போது மாணவ- மாணவிகள், செயல்முறை தேர்வுக்கும், கருத்தியல் தேர்வுக்கும் சிறப்பான முறையில் படித்து தேர்ச்சி பெறுமாறு அறிவுரை வழங்கினார். இந்த செய்முறை தேர்வு அடுத்த மாதம் (மே) 2-ந் தேதி வரை நடைபெறுகிறது.

கள்ளக்குறிச்சி

அதேபோல் கள்ளக்குறிச்சி மாவட்டத்தில் 11 மற்றும் 12-ம் வகுப்பு மாணவர்களுக்கான செய்முறை தேர்வு மாவட்டம் முழுவதும் 73 தேர்வு மையங்களில் நடைபெற்றது. இதில் 12-ம் வகுப்புக்கான செய்முறை தேர்வை 9,625 மாணவர்கள், 9,989 மாணவிகள் என மொத்தம் 19,614 பேரும், 11-ம் வகுப்புக்கான செய்முறை தேர்வை 10,800 மாணவர்கள், 10,589 மாணவிகள் என மொத்தம் 21,389 பேரும் எழுதினர்.

அதேபோல் 10-ம் வகுப்புக்கான செய்முறை தேர்வு 88 தேர்வு மையங்களில் நடைபெற்றது. இதில் 11,667 மாணவர்கள், 10,834 மாணவிகள் என மொத்தம் 22,461 பேர் தேர்வு எழுதினர்.