தளி அருகே கார் மரத்தில் மோதி விவசாயி சாவு

தேன்கனிக்கோட்டை:

தேன்கனிக்கோட்டை அருகே உள்ள அலேநத்தம் கிராமத்தை சேர்ந்தவர் ஆனந்தன் (வயது 28). விவசாயி. டி.ஜி. தொட்டி கிராமத்தை சேர்ந்தவர் பரத் (28), தேன்கனிக்கோட்டையை சேர்ந்தவர் மதன் (27). நண்பர்களான இவர்கள் நேற்று முன்தினம் கர்நாடக மாநிலம் ஆனைக்கல் பகுதியில் நடந்த நிகழ்ச்சிக்கு சென்று விட்டு மீண்டும் ஊருக்கு காரில் வந்து கொண்டு இருந்தனர். தளி அருகே கோபசந்திரம் அருகே வந்தபோது சாலையோரம் இருந்த மரத்தில் கார் மோதியது. இந்த விபத்தில் காரின் முன்பகுதி நொறுங்கியது. இதில் 3 பேரும் படுகாயம் அடைந்தனர். அவர்களை அக்கம் பக்கத்தினர் மீட்டு தேன்கனிக்கோட்டை அரசு மருத்துவமனைக்கு அனுப்பி வைத்தனர். பின்னர் மேல் சிகிச்சைக்காக பெங்களூரு தனியார் மருத்துவமனையில் அவர்கள் அனுமதிக்கப்பட்டனர். அங்கு தீவிர சிகிச்சை அளித்தும் பலனின்றி ஆனந்தன் பரிதாபமாக இறந்தார். மற்ற 2 பேருக்கும் தீவிர சிகிச்சை அளிக்கப்பட்டு வருகிறது. இந்த விபத்து குறித்து தளி போலீசார் வழக்குப்பதிவு செய்து விசாரணை நடத்தி வருகின்றனர்.