ஆடுகள் திருட்டு; 2 பேர் கைது

பாடாலூர்:

பெரம்பலூர் மாவட்டம் ஆலத்தூர் தாலுகா நக்கசேலம் கிராமத்தில் வசித்து வருபவர் சிவபாலன். இவருக்கு சொந்தமான 3 ஆடுகளையும், அதே பகுதியைச் சேர்ந்த தென்னரசு என்பவருக்கு சொந்தமான 7 ஆடுகளையும் 2 பேர் சரக்கு ஆட்டோவில் திருடிச்சென்றதாக கூறப்படுகிறது. அப்போது ஆத்தூர் பகுதியில் வாகன சோதனையில் ஈடுபட்ட போலீசார், அவர்களை பிடித்து விசாரணை நடத்தினர். அப்போது 2 பேரும் முன்னுக்குப் பின் முரணாக பதில் அளித்ததால் போலீசார் சந்தேகம் அடைந்தனர். இதையடுத்து போலீசார் நடத்திய தீவிர விசாரணையில் அவர்கள் தர்மபுரி மாவட்டம், பாப்பிரெட்டிப்பட்டி தாலுகா, ராணி மூக்கனூர் கிராமத்தைச் சேர்ந்த வினோத் கண்ணன்(வயது 27) மற்றும் இவருடைய நண்பனான இதே பகுதியைச் சேர்ந்த சுரேஷ்(33) என்பதும், ஆடுகளை திருடி சந்தைக்கு கொண்டு சென்றதும் தெரியவந்தது. இதுபற்றி தகவல் அறிந்த பாடாலூர் போலீசார், 2 பேர் மீதும் வழக்குப்பதிந்து, அவர்களை கைது செய்தனர்.