குளத்தில் மூழ்கி 2 சிறுவர்கள் சாவு

சிக்கமகளூரு:

 சிக்கமகளூரு மாவட்டம் தரிகெரே தாலுகா துக்லாபுரா கிராமத்தை சேர்ந்தவர் லோகேஷ். இவரது மனைவி விஜயகுமாரி. இந்த தம்பதிக்கு தனுஷ்(வயது 15) என்ற மகன் இருந்தான். தனுஷ், அதேப்பகுதியில் உள்ள பள்ளியில் 9-ம் வகுப்பு படித்து வந்தான். இந்த நிலையில் நேற்றுமுன்தினம் மாலை தனுஷ், அதேப்பகுதியை சேர்ந்த தனது நண்பன் சச்சின்(15) என்பவனுடன் சேர்ந்து கிராமத்தை ஒட்டியுள்ள குளத்திற்கு குளிக்க சென்றுள்ளான். 

அப்போது சிறுவர்கள் 2 பேரும், குளத்தின் ஆழமான பகுதிக்கு சென்று குளித்ததாக தெரிகிறது. இதனால் ஒரு கட்டத்தில் நிலைதடுமாறிய 2 பேரும் குளத்தில் மூழ்கி தத்தளித்து உள்ளனர். ஆனால் அப்போது அங்கு யாரும் இல்லையென கூறப்படுகிறது. இதனால் சிறிதுநேரத்தில் குளத்தில் மூழ்கி தனுசும், சச்சினும் அடுத்தடுத்து பரிதாபமாக உயிரிழந்தனர். இதுகுறித்து தரிகெரே போலீசார் வழக்கு பதிவு செய்து விசாரணை நடத்தி வருகின்றனர்.