‘தினத்தந்தி’ புகார் பெட்டி

நிலக்கோட்டை தாலுகா அணைப்பட்டி ரோடு பகுதியில் உள்ள சாக்கடை கால்வாயில் குப்பைகள் கொட்டப்படுகின்றன. இதனால் கால்வாயில் அடைப்பு ஏற்பட்டு கழிவுநீர் வெளியேறாமல் தேங்கி நிற்கிறது. இதன் காரணமாக அப்பகுதி முழுவதும் துர்நாற்றம் வீசுவதுடன் சுகாதாரக்கேடும் ஏற்பட்டுள்ளது. எனவே கால்வாயை தூர்வார சம்பந்தப்பட்ட அதிகாரிகள் நடவடிக்கை எடுக்க வேண்டும்.

-ரமேஷ்குமார், நிலக்கோட்டை.

பழனி இட்டேரி ரோடு பகுதியில் உள்ள கட்டிடங்களில் சில பராமரிப்பு பணிக்காக இடிக்கப்படுகின்றன. அப்போது தேங்கும் கட்டிட கழிவுகள் சாலையோரத்திலேயே கொட்டப்படுகின்றன. இதனால் அந்த வழியாக செல்லும் வாகன ஓட்டிகள் விபத்தில் சிக்கும் சம்பவங்கள் அடிக்கடி நடக்கிறது. இதனை தடுக்க சம்பந்தப்பட்ட அதிகாரிகள் உரிய நடவடிக்கை எடுக்க வேண்டும்.

-செந்தில்குமார், பழனி.

பழனியை அடுத்த சின்னக்கலையம்புத்தூரில் இருந்து பழனியாண்டவர் மகளிர் கல்லூரிக்கு காலை, மாலை நேரங்களில் முறையாக பஸ்கள் இயக்கப்படுவதில்லை. இதனால் மாணவிகள் பெரிதும் அவதிப்படுகின்றனர். எனவே காலை, மாலை நேரங்களில் கூடுதல் பஸ்களை இயக்க சம்பந்தப்பட்ட அதிகாரிகள் நடவடிக்கை எடுப்பார்களா?

-பிரபாகரன், அ.கலையம்புத்தூர்.

கம்பம் பஸ் நிலையத்தில் உள்ள புறக்காவல் நிலையம் கடந்த சில மாதங்களாக செயல்படாமல் பூட்டியே கிடக்கிறது. இதனால் பயணிகளின் உடைமைகள் திருடு போகும் சம்பவங்கள் அதிகரிக்கத்தொடங்கியுள்ளது. எனவே புறக்காவல் நிலையத்தை மீண்டும் செயல்பாட்டுக்கு கொண்டுவர சம்பந்தப்பட்ட அதிகாரிகள் நடவடிக்கை எடுக்க வேண்டும்.

-முருகேசன், கம்பம்.