இலுப்பூர் அருகே மரத்தில் இருந்து விழுந்து தொழிலாளி சாவு இறப்பில் சந்தேகம் இருப்பதாக கூறி உறவினர்கள் சாலை மறியல்

புதுக்கோட்டை மாவட்டம், இலுப்பூர் அருகே உள்ள கல்குளியம்பட்டியை சேர்ந்தவர் சுப்பிரமணி. இவரது மகன் ரமேஷ் (வயது 33). தொழிலாளி. இவரது மனைவி ராஜலட்சுமி.  ரமேஷ் தனது மனைவியுடன் இலுப்பூரில் வசித்து வந்தார். இந்த நிலையில் நேற்று முன்தினம் ரமேஷ் பனை மரத்தில் நுங்கு வெட்டுவதற்காக ஏறிய போது தவறி விழுந்து படுகாயம் அடைந்ததாக கூறப்படுகிறது. 

பின்னர் அருகில் இருந்தவர்கள் அவரை மீட்டு சிகிச்சைக்காக இலுப்பூர் அரசு மருத்துவமனையில் அனுமதித்தனர். அங்கு சிகிச்சை பலனின்றி ரமேஷ் பரிதாபமாக உயிரிழந்தார். பின்னர் ரமேசின் உடலை அவரது சொந்த ஊரான கல்குளியம்பட்டி கொண்டு சென்றனர். இதற்கிடையில் தகவல் அறிந்த ரமேஷ் உறவினர்கள் மீண்டும் ரமேஷ் உடலை இலுப்பூர் அரசு மருத்துவமனைக்கு கொண்டு வந்தனர். 

பின்னர் ரமேஷ் இறந்த தகவலை அவரது மனைவி ராஜலட்சுமிக்கும், அவரது உறவினர்களான எங்களுக்கு தெரியப்படுத்தவில்லை எனவும், தற்போது ராஜலட்சுமி எங்கு இருக்கிறார் என்பதும் தெரியவில்லை. எனவே ரமேஷ் இறப்பில் சந்தேகம் இருப்பதாக கூறி அவரது உறவினர்கள்  இலுப்பூர் அரசுமருத்துவமனை அருகே புதுக்கோட்டை-விராலிமலை சாலையில் நள்ளிரவில்   மறியலில் ஈடுபட்டனர். இதனால் பரபரப்பு ஏற்பட்டது. 

இதுகுறித்து தகவல் அறிந்த இலுப்பூர் போலீஸ் சப்-இன்ஸ்பெக்டர் சரண்யா மற்றும் போலீசார் சம்பவ இடத்திற்கு விரைந்து வந்து மறியலில் ஈடுபட்டவர்களிடம் பேச்சுவார்த்தை நடத்தினர். பின்னர் இலுப்பூரில் உள்ள ரமேசின் வீட்டிற்கு சென்று பார்த்தபோது அவரது மனைவி ராஜலட்சுமி வீட்டில் இல்லாதது தெரியவந்தது. இதனையடுத்து போலீசார் இதுகுறித்து வழக்குப்பதிவு செய்து விசாரணை நடத்தி வருகின்றனர்.